حب پاور کے جوائنٹ وینچر پرائم گلوبل انرجیز کو 4 آن شور ایکسپلوریشن بلاکس حاصل

پرائم انٹرنیشنل آئل اینڈ گیس کمپنی لمیٹڈ (پرائم) جو کہ حب پاور ہولڈنگز لمیٹڈ (ایچ پی ایچ ایل) کا مشترکہ منصوبہ ہے کو اپنی مکمل ملکیت والی ذیلی کمپنی پرائم گلوبل انرجیز لمیٹڈ کے ذریعے پاکستان میں چار آن شور بلاکس کی تلاش کے حقوق عارضی طور پر تفویض کیے گئے ہیں۔

یہ پیشرفت ایچ پی ایچ ایل کی پیرنٹ کمپنی، دی حب پاور کمپنی لمیٹڈ کی طرف سے جمعہ کو پاکستان سٹاک ایکسچینج کو دیے گئے ایک نوٹس میں ظاہر کی گئی ہے۔

نوٹس میں کہا گیا کہ ہمیں یہ اطلاع دیتے ہوئے خوشی ہے کہ ریگولیٹری اتھارٹیز کی منظوری اور قانونی و انتظامی امور کی تکمیل کے بعد پرائم گلوبل انرجیز لمیٹڈ کو چار آنشور بلاکس کی تلاش کے حقوق عارضی طور پر تفویض کیے گئے ہیں، جن میں دیگر شراکت دار پاکستان پیٹرولیم لمیٹڈ (پی پی ایل)، ماری انرجیز لمیٹڈ (ماری) اور آئل اینڈ گیس ڈیولپمنٹ کمپنی لمیٹڈ (او جی ڈی سی ایل) شامل ہیں۔

پرائم گلوبل انرجیز لمیٹڈ بلاک 2465-5 (سپاٹ بندر) میں 31 فیصد حصہ رکھے گا اور آپریٹر کے طور پر کام کرے گا۔ باقی تین بلاکس یعنی بلاک 2267-3 (ضرار)، بلاک 2367-6 (کیٹی بندر) اور بلاک 2466-10 (بن قاسم ساؤتھ) میں کمپنی ہر ایک میں 20 فیصد حصہ داری رکھے گی۔

دریں اثنا جمعہ کو پاکستان اسٹاک ایکسچینج کو ایک علیحدہ نوٹس میں فاطمہ فرٹیلائزر کمپنی لمیٹڈ (ایف ایف سی ایل) نے اطلاع دی کہ اس کی مکمل ملکیت والی ذیلی کمپنی فاطمہ پیٹرولیم کمپنی لمیٹڈ (ایف پی سی ایل) کو ڈائریکٹوریٹ جنرل آف پیٹرولیم کنسیشنز (ڈی جی پی سی) نے دو آف شور ایکسپلوریشن بلاکس میں شراکت داری کے حقوق عارضی طور پر تفویض کیے ہیں۔

جمعرات کو ماری انرجیز لمیٹڈ نے اعلان کیا کہ پاکستان ای اینڈ پی آف شور بڈ راؤنڈ 2025 کے بعد اسے 23 نئے آف شور ایکسپلوریشن بلاکس کے لیے عارضی حقوق حاصل ہوگئے ہیں۔