فوجی سیمنٹ اور کیپکو نے اٹک سیمنٹ میں کنٹرولنگ شیئرز لینے کی منظوری دیدی

فوجی سیمنٹ کمپنی لمیٹڈ (ایف سی سی ایل) نے اعلان کیا ہے کہ اس کے بورڈ آف ڈائریکٹرز نے کوٹ ادو پاور کمپنی لمیٹڈ (کیپکو) کے ساتھ ملکر اٹک سیمنٹ پاکستان لمیٹڈ (اے سی پی ایل) میں کنٹرولنگ شیئرز حاصل کرنے کے منصوبے کی منظوری دے دی ہے۔

اس لسٹڈ سیمنٹ ساز کمپنی نے یہ پیش رفت پاکستان اسٹاک ایکسچینج (پی ایس ایکس) کو دیے گئے اپنے نوٹس میں ظاہر کی۔

ایف سی سی ایل نے کہا کہ یہ خریداری اے سی پی ایل کے جاری شدہ اور ادا شدہ سرمائے کے 84.06 فیصد پر مشتمل ہوگی، جس سے دونوں کمپنیوں کو مشترکہ کنٹرول حاصل ہوگا۔

معاہدے کے تحت فوجی سیمنٹ 57.76 ملین عام حصص خریدے گی، جو اے سی پی ایل کے ادا شدہ سرمایہ کا 42.03 فیصد بنتے ہیں، جبکہ کیپکو اتنے ہی حصص خریدے گی جو مزید 42.03 فیصد شیئر کی نمائندگی کرتے ہیں۔

نوٹس کے مطابق یہ خریداری شیئر پرچیز ایگریمنٹ اور متعلقہ لین دین کے دستاویزات پر دستخط، ریگولیٹری منظوریوں کی تکمیل اور ان شرائط کے پورے ہونے سے مشروط ہے جو ان دستاویزات میں درج ہیں۔

یہ پیش رفت اس وقت سامنے آئی ہے جب فیراؤن انویسٹمنٹ گروپ لمیٹڈ (جو لبنان میں قائم کمپنی ہے) اٹک سیمنٹ پاکستان لمیٹڈ میں اپنے حصص کی اسٹریٹجک فروخت پر غور کر رہی ہے۔

اس ممکنہ فروخت میں سیمنٹ اور توانائی کے شعبے کی کئی بڑی کمپنیوں نے دلچسپی ظاہر کی ہے، جن میں چیراٹ سیمنٹ، بیسٹ وے گروپ، کیپکو اور فوجی سیمنٹ شامل ہیں۔

گزشتہ اگست میں کیپکو اور فوجی فاؤنڈیشن (ایف ایف) نے موجودہ شیئر ہولڈر فیراؤن انویسٹمنٹ گروپ لمیٹڈ ایس اے ایل کو اپنے تمام شیئرز خریدنے کی بائنڈنگ آفر جمع کروائی تھی۔

اس سے قبل فیراؤن انویسٹمنٹ گروپ نے اپنے اسٹیک ہولڈرز کو آگاہ کیا تھا کہ کچھ ممکنہ سرمایہ کاروں نے اے سی پی ایل میں اس کے شیئرز خریدنے میں دلچسپی ظاہر کی ہے اور باضابطہ پیشکشیں جمع کرانے کا ارادہ بھی ظاہر کیا ہے۔

فیراؤن انویسٹمنٹ گروپ نے بتایا کہ اس نے اسٹینڈرڈ چارٹرڈ بینک کو اس ڈائیوسٹمنٹ (حصص فروخت) کے عمل کے لیے مالی مشیر مقرر کیا ہے۔

اٹک سیمنٹ پاکستان لمیٹڈ 14 اکتوبر 1981 کو پاکستان میں ایک پبلک لمیٹڈ کمپنی کے طور پر شامل کی گئی تھی۔

یہ کمپنی فیراؤن انویسٹمنٹ گروپ لمیٹڈ ہولڈنگ ایس اے ایل (لبنان) کی ذیلی کمپنی ہے۔کمپنی کا بنیادی کاروبار سیمنٹ کی تیاری اور فروخت ہے۔