دہشتگردی یا خودکش حملہ ہوا تو طالبان کو خمیازہ بھگتنا پڑیگا ، وزیرِ دفاع

وزیرِ دفاع خواجہ آصف نے بدھ کو خبردار کیا ہے کہ پاکستان طالبان حکمرانوں کی دھوکہ دہی اور تمسخر کو اب مزید برداشت نہیں کرے گا اور اگر کوئی دہشت گرد حملہ یا خودکش دھماکہ ہوا تو طالبان کو اپنی ان غلطیوں کا خمیازہ بھگتنا پڑے گا۔

سماجی رابطے کی ویب سائٹ ایکس پر اپنے بیان میں وزیرِ دفاع نے کہا کہ پاکستان نے برادر ممالک کی درخواست پر طالبان حکومت سے مذاکرات کیے ، تاکہ امن کا موقع دیا جا سکے، لیکن کچھ افغان حکام کے زہریلے بیانات طالبان حکومت کی منافقانہ اور منقسم سوچ کو ظاہر کرتے ہیں۔

خواجہ آصف کا بیان اس وقت سامنے آیا جب وفاقی وزیر اطلاعات و نشریات عطااللہ تارڑ نے کہا کہ استنبول میں اسلام آباد اور کابل کے درمیان ہونے والے تازہ مذاکرات کسی نتیجے پر نہیں پہنچ سکے کیونکہ افغان فریق بنیادی مسئلے سے ہٹتا رہا اور اصل نکتہ طے کرنے سے گریز کیا۔

رواں ماہ پاک افغان سرحد پر ہونے والی جھڑپوں میں درجنوں افراد مارے گئے، جو 2021 میں طالبان کے کابل پر قابض ہونے کے بعد سب سے شدید پرتشدد واقعات تھے۔

خواجہ آصف نے الزام عائد کیا کہ کابل کے طالبان حکمران اپنی ناجائز حکومت اور جنگی معیشت کو برقرار رکھنے کے لیے افغانستان کو ایک اور تصادم میں دھکیل رہے ہیں۔

ان کا کہنا تھا کہ اگر افغان طالبان اپنی ہی سرزمین اور عوام کو تباہ کرنے پر تُلے ہوئے ہیں تو پھر انہیں اس کے نتائج بھی بھگتنا ہوں گے۔

انہوں نے افغانستان کے لیے استعمال ہونے والے جملے سلطنتوں کا قبرستان پر تبصرہ کرتے ہوئے کہا کہ پاکستان خود کو کوئی سلطنت نہیں سمجھتا، مگر افغانستان واقعی اپنی ہی قوم کے لیے قبرستان بن چکا ہے۔تاریخ گواہ ہے کہ افغانستان سلطنتوں کا قبرستان نہیں بلکہ ہمیشہ اُن کے کھیل کا میدان رہا ہے۔

خواجہ آصف نے خبردار کیا کہ طالبان حکومت کے اندر موجود وہ عناصر جو خطے میں عدم استحکام سے فائدہ اٹھا رہے ہیں، یہ جان لیں کہ انہوں نے پاکستان کے عزم اور حوصلے کو غلط سمجھا ہے۔

ان کا کہنا تھا کہ اگر طالبان حکومت ہم سے لڑنا چاہتی ہے تو دنیا ان شاءاللہ دیکھ لے گی کہ ان کی دھمکیاں محض ایک تماشا ہیں۔

پس منظر:

رواں ماہ کابل میں تحریکِ طالبان پاکستان (ٹی ٹی پی) کے سربراہ کو نشانہ بنانے والے ایک فضائی حملے کے بعد جھڑپیں شروع ہوئیں۔ اس کے جواب میں ٹی ٹی پی کے دہشت گردوں نے 2,600 کلومیٹر طویل سرحد پر پاکستانی فوجی چوکیوں پر حملے کیے۔ پاکستان کا مؤقف ہے کہ طالبان حکومت ٹی ٹی پی کو افغانستان میں آزادانہ کارروائیاں کرنے دے رہی ہے، جہاں سے وہ پاکستان پر حملے کرتی ہے۔ تاہم کابل اس الزام کی تردید کرتا ہے۔