پی آئی اے کا برطانیہ کیلئے پروازوں کا پانچ سال بعد دوبارہ آغاز

پاکستان انٹرنیشنل ایئر لائنز (پی آئی اے) نے ہفتے کو باضابطہ طور پر برطانیہ (یو کے) کے لیے اپنی پروازوں کے دوبارہ آغاز کا اعلان کردیا۔ پانچ سال کے وقفے کے بعد پروازیں 25 اکتوبر سے شروع ہوں گی۔

پہلے مرحلے میں قومی ایئرلائن اسلام آباد سے مانچسٹر کے لیے ہفتے میں دو پروازیں چلائے گی جو ہفتے اور منگل کو آپریشن میں ہوں گی۔

شیڈول کے مطابق اسلام آباد سے پرواز دوپہر 12 بجے روانہ ہوگی اور شام 5 بجے مانچسٹر پہنچے گی۔ اسی طرح مانچسٹر سے پرواز شام 7 بجے روانہ ہو کر صبح 7 بجے اسلام آباد پہنچے گی۔

ترجمان پی آئی اے کے مطابق مانچسٹر کے لیے پروازوں کی تعداد بتدریج بڑھائی جائے گی جبکہ ایئرلائن کے برطانیہ میں توسیعی منصوبے کے دوسرے مرحلے میں لندن کے لیے بھی خدمات متعارف کرائی جائیں گی۔ پروازیں بکنگ کے لیے کھول دی گئی ہیں۔

ترجمان نے مزید کہا کہ اب ہمارے ہم وطن 15 گھنٹے کی مسافت کے بجائے صرف 8 گھنٹوں میں اپنی منزل پر پہنچ جائیں گے۔

انہوں نے کہا کہ ہمارا مقصد مسافروں کو سب سے زیادہ آرام دہ اور مکمل سہولیات سے لیس سفر فراہم کرنا ہے۔

ایک روز قبل پاکستان ہائی کمیشن لندن نے اعلان کیا تھا کہ برطانیہ کی سول ایوی ایشن اتھارٹی نے فارن ایئرکرافٹ آپریٹنگ پرمٹ جاری کر دیا ہے جو تجارتی پروازوں کے آغاز کے لیے آخری ضروری دستاویز ہے۔

پچھلے ماہ، پی آئی اے کو برطانیہ کے لیے تھرڈ کنٹری آپریٹر کی منظوری باقاعدہ طور پر موصول ہوئی جس سے ایئرلائن کو نہ صرف مسافروں بلکہ کارگو لے جانے والی براہِ راست پروازیں چلانے کی اجازت حاصل ہو گئی۔

اس وقت پی آئی اے نے کہا تھا کہ وہ اکتوبر سے اپنی پروازیں شروع کرے گی، ابتدا مانچسٹر سے ہوگی۔

بعد میں جب پروازیں مستحکم ہو جائیں گی، برمنگھم اور لندن کو بھی پی آئی اے کے پرواز کے شیڈول میں شامل کیا جائے گا۔

جولائی میں برطانیہ کی ایئر سیفٹی کمیٹی نے پاکستانی کیریئرز پر عائد پابندیاں ختم کردی تھیں۔

معطلی سے قبل پی آئی اے برطانیہ کے لیے ہفتہ وار 21 پروازیں چلاتی تھی جن میں 10 لندن، 9 مانچسٹر اور 2 برمنگھم کے لیے شامل تھیں۔

پروازوں کی دوبارہ بحالی پاکستانی مسافروں کے لیے برطانیہ اور یورپ کے سفر میں رابطے کو نمایاں طور پر بہتر بنائے گی۔