جاپانی ای وی کمپنی کی پاکستان میں انٹری، الیکٹرک رکشہ کیورو متعارف کرادیا

جاپان کی معروف الیکٹرک وہیکل کمپنی ٹیراموٹرز نے پاکستان میں اپنا فلیگ شپ الیکٹرک تھری وہیلر کیورو (Kyoro) رکشہ متعارف کرادیا ہے۔

بدھ کو جاری کیے گئے پریس بیان کے مطابق یہ تھری وہیلر مسافروں کی آمدورفت اور لاجسٹکس دونوں کے لیے خصوصی طور پر تیار کیا گیا ہے۔

کیورو کی رفتار 55 کلومیٹر فی گھنٹہ سے زائد ہے جو ایک چارج پر 200 کلومیٹر تک سفر کی صلاحیت رکھتی ہے اور 11.7 کلو واٹ آور بیٹری کی طاقت اسے مقامی سڑکوں کے لیے انتہائی موزوں بناتی ہے جب کہ محض چار گھنٹے میں مکمل چارج ہو جاتی ہے۔

پاکستان میں آمد ٹیراموٹرز کے اس مشن کا ایک اہم سنگِ میل ہے جس کے تحت وہ ایشیا اور افریقہ میں پائیدار، سستی اور اعلیٰ معیار کی سفری سہولتیں فراہم کرنا چاہتی ہے۔

اپنی ترقیاتی حکمت عملی کے طور پر کمپنی پاکستان میں واحد ڈسٹری بیوٹر پارٹنرز کی تلاش میں ہے تاکہ ماحول دوست اور جدید ٹرانسپورٹ کے تصور کو فروغ دیا جا سکے۔

پڑوسی ملک کی تین وہیلر مارکیٹ میں کامیابی کے بعد کمپنی کو یقین ہے کہ کیورو پاکستان میں بھی ڈرائیورز کی آمدنی بڑھانے اور سستی و جدید شہری ٹرانسپورٹ فراہم کرنے میں مددگار ثابت ہوگا۔

اس موقع پر ٹیراموٹرز کارپوریشن کے منیجنگ ڈائریکٹر گو سوزوکی نے کہا کہ بطور ایک جاپانی کمپنی ہمیں فخر ہے کہ ہم اپنی جدید ای وی ٹیکنالوجی اور قابلِ اعتماد انجینئرنگ پاکستان لارہے ہیں, ہم پاکستان کو ان اہم منڈیوں میں سے ایک سمجھتے ہیں جہاں ہم ایشیا میں پائیدار سفری سہولتوں کے منظرنامے کو تبدیل کر سکتے ہیں۔

کیورو کے آغاز اور مقامی شراکت داروں کے ساتھ تعاون کے ذریعے ہمارا مقصد روزگار کے مواقع پیدا کرنا، ایندھن پر انحصار کم کرنا اور ایک صاف ستھرا،ماحول دوست اور زیادہ مؤثر ٹرانسپورٹ نظام قائم کرنا ہے۔