یورپی یونین بھارت کے ساتھ شراکت داری کو مزید مستحکم کرنے کی خواہاں

یورپی کمیشن نے بدھ کے روز بھارت کے ساتھ دفاع، ٹیکنالوجی اور تجارت جیسے شعبوں میں تعاون کو مزید مستحکم کرنے کے منصوبوں کا اعلان کیاہے، حالانکہ ماسکو کے ساتھ نئی دہلی کے بڑھتے ہوئے تعلقات پر کشیدگی موجود ہے۔

یورپی یونین اور بھارت آزاد تجارتی معاہدے پر بات چیت کے آخری مراحل میں ہیں، جسے دونوں فریق 2023 کے آخر تک مکمل کرنے کا ارادہ رکھتے ہیں۔

یہ بات چیت 2022 میں دوبارہ شروع کی گئی تھی اور امریکی صدر ڈونلڈ ٹرمپ کی دوبارہ انتخاب کے بعد تیز رفتار ہو گئی ہے۔ٹرمپ کی جانب سے تجارتی محصولات کے نفاذ کے بعد دونوں فریقوں نے نئی اتحادی شراکت داریوں کی تشکیل کی رفتار بڑھا دی ہے۔

برسلز کے لیے اس کا مطلب میکسیکو، جنوبی امریکہ کے بلاک مرکوسور، بھارت اور انڈونیشیا کے ساتھ تجارتی معاہدوں کا منصوبہ ہے۔بھارت یورپی یونین کے ساتھ تعلقات میں بھی مواقع دیکھ رہا ہے،تاہم اس کی دلچسپی چین اور روس کے ساتھ تعلقات میں بھی ہے۔

جب روس نے 2022 میں یوکرین پر بڑا حملہ کیا، تو اس کے بعد بھارت نے روس سے تیل زیادہ مقدار میں خریدنا شروع کر دیا۔ گزشتہ ماہ بھارتی وزیرِ اعظم نریندر مودی نے چین میں ایک سمٹ کے دوران روسی صدر ولادیمیر پوتن کے ساتھ ہاتھ ملا کر مضبوط اتحاد کا پیغام دیا اور بھارتی فوجیوں نے روس کی قیادت میں ہونے والی فوجی مشق میں بھی شرکت کی۔

جمعہ کو امریکی عہدیداروں نے جی 7 اور یورپی یونین کے ممالک سے مطالبہ کیا کہ وہ روسی تیل کی خریداری پر چین اور بھارت پر محصولات عائد کریں۔

کمیشن نے کہا کہ یورپی یونین بھارت کے ساتھ روس کی فوجی سرگرمیوں کو محدود کرنے اور یورپی یونین کی پابندیوں کی خلاف ورزی کے امکانات کو روکنے کے لیے مزید تعاون کرے گی۔

کشیدگی کے باوجود یورپی یونین بھارت کو قواعد پر مبنی کثیرالجہتی نظام کے حامی کے طور پر دیکھتی ہے اور 2030 تک دنیا کی تیسری سب سے بڑی معیشت بننے کی توقعات سے فائدہ اٹھانے کی امید رکھتی ہے۔

یورپی یونین چاہتی ہے کہ بھارت کے ساتھ سرمایہ کاری،ہوائی سفر،سپلائی چین، ماحول دوست توانائی اور تحقیق جیسے شعبوں میں تعاون بڑھایا جائے۔