گڈو اور سکھر بیراج پر درمیانے درجے کا سیلاب

محکمہ موسمیات نے کہا ہے کہ گڈو اور سکھر بیراج پر درمیانے درجے کا سیلاب ہے جبکہ کوٹری پر نچلے درجے کا سیلاب ہے۔

جمعہ کی صبح 6 بجے گڈو بیراج پر پانی کی آمد 5 لاکھ 12 ہزار 662 کیوسک، سکھر بیراج پر 4 لاکھ 91 ہزار 760 کیوسک اور کوٹری پر 2 لاکھ 69 ہزار 84 کیوسک ریکارڈ کی گئی۔

محکمہ موسمیات نے بتایا کہ سندھ کے بیشتر علاقوں میں موسم گرم اور مرطوب رہے گا، جبکہ آج کراچی ڈویژن کے علاوہ جامشورو، حیدرآباد، میرپورخاص، سانگھڑ، ٹھٹھہ، بدین اور سجاول اضلاع میں بوندا باندی یا ہلکی بارش کا امکان ہے۔

کراچی میں ہفتہ اور اتوار کو موسم جزوی طور پر ابر آلود اور مرطوب رہنے کی توقع ہے۔ زیادہ سے زیادہ درجہ حرارت 31 سے 33 ڈگری سینٹی گریڈ اور کم سے کم 25 سے 27 ڈگری سینٹی گریڈ کے درمیان رہے گا۔

صبح کے وقت ہوا میں نمی 75 سے 88 فیصد جبکہ شام کے وقت 65 سے 75 فیصد کے درمیان رہے گی، اس دوران ہوائیں مغرب سے جنوب مغرب کی سمت چلتی رہیں گی۔ ضروری اقدامات کے لیے یہ ایڈوائزری حکومت، شہری انتظامیہ اور ڈیزاسٹر مینجمنٹ حکام کے ساتھ شیئر کردی گئی ہے۔

کاپی رائٹ بزنس ریکارڈر 2025