چینی الیکٹرک وہیکلز ٹیکنالوجی عالمی آٹو ڈیزائن کو کیسے بدل رہی ہے؟

جب آڈی کے ایگزیکٹوز نے پہلی بار 2021 میں زیکر 001 کو دیکھا، جو ایک طویل رینج الیکٹرک گاڑی تھی اور یورپی خوبصورتی رکھتی تھی، تو یہ جرمن پریمیم آٹو برانڈ کے لیے ایک ویک اپ کال تھی – اگر اسے چینیوں کے ساتھ مقابلہ کرنا تھا تو اسے ان کی ٹیکنالوجی درکار تھی۔

ایس اے آئی سی آڈی سیلز اینڈ مارکیٹنگ کے صدر اسٹیفن پوئٹزل نے کہا کہ اس وقت زیکر 001 نے تقریباً سب کو چونکا دیا تھا، ہمیں اس بارے میں کچھ کرنا پڑا۔

چینی صارفین کے لیے اپنی ای وی لائن اپ کو بڑھانے کے لیے، آڈی نے صرف 18 ماہ میں آڈی ای 5 اسپورٹ بیک تیار کی، جس میں اس کے چینی پارٹنر ایس اے آئی سی کی فراہم کردہ ٹیکنالوجی استعمال کی گئی، جن میں بیٹریاں، الیکٹرک پاور ٹرین، انفوٹینمنٹ سافٹ ویئر اور جدید ڈرائیونگ اسسٹڈ سسٹمز شامل ہیں۔

آڈی کو توقع ہے کہ وہ اس ماہ چین میں اپنے گاہکوں کو 33,000 ڈالر مالیت کی یہ ای وی فراہم کرنا شروع کر دے گی اور اس کے عالمی حریف بھی اب نئے ماڈلز کو تیزی سے متعارف کرانے کے لیے چینی انٹلیکچوئل پراپرٹی استعمال کرنے کے خواہاں ہیں۔

ٹويوٹا اور وولکس ویگن کے پاس چین کے لیے خصوصی ماڈلز تیار کرنے کے منصوبے ہیں، جن میں بالترتیب چینی پارٹنرز جی اے سی اور ایکس پَینگ کی ٹیکنالوجی شامل ہو گی۔

ذرائع کے مطابق رینو اور فورڈ ایک قدم آگے بڑھنا چاہتے ہیں اور چینی ای وی پلیٹ فارمز پر عالمی ماڈلز تیار کرنا چاہتے ہیں۔ رینو نے تبصرے کی درخواست کا جواب نہیں دیا۔

فورڈ نے تبصرے سے انکار کر دیا۔ ایسے لائسنسنگ ڈیلز فی الحال چینی ای وی بنانےوالوں کے لیے نسبتاً چھوٹی لیکن بڑھتی ہوئی آمدنی کا ذریعہ ہیں، اور اس وقت کے لیے یہ ایک نیا لین دین فراہم کرتی ہیں۔ عالمی آٹو میکرز کو نئے ای وی تیزی سے لانچ کرنے اور ترقیاتی رکاوٹوں کو عبور کرنے کے لیے چینی ٹیکنالوجی کی ضرورت ہے۔

دوسری طرف، چینی کمپنیوں کو گھر میں قیمتوں کی کڑی جنگ اور بیرون ملک شدت پکڑتی تجارتی جنگ کے درمیان اضافی آمدنی کی اشد ضرورت ہے۔

شنگھائی میں قائم کنسلٹنگ فرم آٹوڈیٹاس کے جنرل مینیجر ول وانگ نے کہا کہ یہ ایک نہایت ذہین، دونوں کے لیے فائدہ مند حل ہے، جو بہترین فروخت ہونے والے ای وی ماڈلز کی تفصیلی رپورٹس فراہم کرتی ہے۔

‘چائنا اِن سائیڈ’

یہ نئی حکمت عملی 1990 کی دہائی کی انٹیل اِن سائیڈ مہم سے مشابہت رکھتی ہے – جہاں امریکی چِپ ساز انٹیل نے جدید اجزا استعمال کر کے کمپیوٹرز کو پریمیم مصنوعات میں بدل دیا تھا۔

اس معاملے میں، چینی آٹو میکرز ای وی ٹیکنالوجی ایک پیکج میں فروخت کرتے ہیں: ایسے بنیادی ڈھانچے جو تیار کرنے کے لیے تیار، وائٹ لیبل بیٹری پر مبنی کاریں ہیں جو کم بجٹ والے کم حجم والے مینوفیکچررز کے لیے بھی موزوں ہیں۔

سی ای او ژو جیانگمنگ نے رائٹرز کو بتایا کہ لیپ موٹر نے اسٹیلانٹس کے ساتھ شراکت داری کی ہے تاکہ اپنی ای وی کو چین سے باہر فروخت کر سکے اور دیگر برانڈز کے ساتھ اپنی ٹیکنالوجی لائسنس کرنے کے لیے بھی بات چیت کر رہا ہے۔

آٹو انڈسٹری کے ماہرین کہتے ہیں کہ تیار شدہ چینی ای وی چیسی اور سافٹ ویئر استعمال کرنا اربوں ڈالر اور کئی سالوں کی ترقیاتی مدت بچا سکتا ہے اور روایتی آٹو میکرز کو چینی حریفوں کا مقابلہ کرنے میں مدد دے سکتا ہے۔

رینو ابتدائی اپنانے والوں میں سے ایک تھا، جس نے 2021 میں یورپ میں فروخت کے لیے ڈیشیا اسپرنگ ای وی کو چین کی ڈونگ فینگ کے پلیٹ فارم پر بنایا۔

دو واقف ذرائع کے مطابق رینو نے ایک قدم مزید آگے بڑھایا ہے نئے الیکٹرل ٹوِنگو کے ساتھ، جو شنگھائی میں اس کے ریسرچ سینٹر میں تیار کیا جا رہا ہے۔ اس میں ایک چینی ای وی انجینئرنگ فرم لانچ ڈیزائن ٹیکنیکل سپورٹ فراہم کر رہی ہے تاکہ ای وی پلیٹ فارم تیار کیا جا سکے۔ لانچ نے تبصرے کی درخواست کا جواب نہیں دیا۔

دو باخبر افراد نے بتایا کہ دیگر چائنا اِن سائیڈ ماڈلز بھی جلد آ سکتے ہیں۔ فورڈ ایک چینی پارٹنر تلاش کر رہی ہے جو ای وی پلیٹ فارم ٹیکنالوجیز فراہم کرے۔

سی ای او جم فارلے اکثر چینی ای وی کی جانچ کرتے ہیں اور حال ہی میں شیاؤمی ایس یو 7 الیکٹرک سیڈان کی تعریف کی۔ وولکس ویگن نے چین کے لیے وقف ماڈلز تیار کرنے کے منصوبے کو وسعت دی ہے، جس میں تمام فیول اقسام شامل ہیں، اور یہ ایکس پینگز کے ساتھ مشترکہ طور پر تیار کیے گئے پلیٹ فارمز پر مبنی ہوں گے، جن میں الیکٹرانکس اور سافٹ ویئر کے لے آؤٹ ڈیزائن شامل ہیں۔

تجزیہ کار کہتے ہیں کہ پرانے آٹو میکرز عام طور پر پھرتیلا ای وی سسٹم تیار کرنے میں جدوجہد کرتے ہیں، جو فوری اپڈیٹ ہو سکے، کیونکہ ان کی تنظیمی ساخت پیچیدہ ہے۔

شنگھائی میں قائم کنسلٹنسی آٹو فارسائٹ کے منیجنگ ڈائریکٹر ییل ژانگ نے کہا کہ یہی وجہ ہے کہ وولکس ویگن یہ دیکھنا چاہتی ہے کہ آیا ایکس پینگز کی ای وی ٹیکنالوجیز وولکس ویگن کی اپنی ٹیکنالوجیز کی تکمیل یا ان کی جگہ لے سکتی ہیں۔

ییل ژانگ نے مزید کہا اگر یہ چین میں کام کرتا ہے، تو وولکس ویگن اس حکمت عملی کو عالمی سطح پر بھی لاگو کر سکتی ہے۔

وولکس ویگن چین کے ترجمان نے رائٹرز کو بتایا کہ اس کا ایکس پینگز کے ساتھ تعاون فی الحال چین پر مرکوز ہے۔

ایکس پینگز کے ہی ژیاوپینگ نے کہا ہے کہ دونوں آٹو میکرز اپنی شراکت داری کو چین سے باہر بھی بڑھانا چاہتے ہیں۔

آٹوڈیٹاس کے وانگ نے کہا کہ اس سے ایکس پینگز کی آمدنی میں اضافہ ہوگا بغیر اس کے کہ وہ بیرون ملک پلانٹس تعمیر کرے۔

اولیور وائی مین کے تجزیہ کار مارکو سانتینو نے کہا کہ روایتی آٹو میکرز سخت چینی ای وی مقابلے کی آگ کی طاقت استعمال کر کے ترقیاتی بلندی پر چھلانگ لگا سکتے ہیں۔

مارکو سانتینو کے مطابق آپ کو مارکیٹ میں کم وقت میں کہیں زیادہ کوالٹی پروف پروڈکٹ ملتی ہے۔

ٹیسلا سے متاثر ہو کر، چین کے ای وی سازوں نے ماڈیولر پلیٹ فارمز تیار کیے ہیں جو لاگت کو کم کرتے ہیں، ترقی کو تیز کرتے ہیں اور انٹری کے رکاوٹوں کو نیچے لاتے ہیں۔

“وہ ٹیسلا سے جلد سیکھنے والے ہیں،” فارسٹ ٹو نے کہا، جو چینی بیٹری کی دیوہیکل کمپنی سی اے ٹی ایل کے سابق ایگزیکٹو ہیں اور جنہوں نے کنسلٹنگ فرم میپل ویو ٹیکنالوجی قائم کی۔

فارسٹ ٹو نے کہا کہ اب یہ فائدہ اتنا بڑا ہے کہ جب چینی ای وی ساز بیرون ملک پھیلتے ہیں تو یہ لائسنسنگ اور رائلٹی سروس کو برقرار رکھنے کے لیے کافی ہے۔

سی اے ٹی ایل نے فورڈ کے ساتھ یہی طریقہ اپنایا، اپنی ٹیکنالوجی کو بیٹری پلانٹ کے لیے لائسنس کیا۔ فارسٹ ٹو نے کہا کہ چینی ٹیکنالوجی کی برآمد کم صنعتی ممالک کو اپنی قومی ای وی برانڈز بنانے میں مدد دے سکتی ہے۔

ابوظہبی میں قائم سی وائے وی این ہولڈنگز، جو نیو میں ایک اسٹریٹجک سرمایہ کار ہے، نے چینی ای وی ساز کے چیسی اور سافٹ ویئر کا استعمال کرتے ہوئے اپنا پریمیم ای وی ماڈل تیار کیا ہے۔

معاملے سے واقف دو ذرائع کے مطابق سی وائے وی این نے اپریل میں برطانوی اسپورٹس کار ساز میک لارن کو خریدا اور اب منصوبہ رکھتا ہے کہ اپنی ای وی کو میک لارن برانڈ کے تحت فروخت کرے۔ لیکن ایک ذریعے نے کہا کہ مستقبل کے ماڈلز میں کہیں زیادہ میک لارن کا ڈی این اے شامل ہوگا اور کم چینی ٹیکنالوجی۔ جس پر نیو نے تبصرے سے انکار کیا۔

سی وائے وی این نے تبصرے کی درخواست کا جواب نہیں دیا۔

اس کے ایگزیکٹو صدر ہو گولیانگ نے کہا اسی دوران، سی اے ٹی ایل کا نیا ای وی چیسی صارفین کو یہ اجازت دے گا کہ وہ فیصلہ کریں کہ ایک ای وی کیسی دکھتی ہے، بجائے اس کے کہ بڑی آٹو میکرز یہ طے کریں کہ کیا بیچا جائے۔

سی اے ٹی ایل نے کہا کہ وہ آئندہ تین سالوں میں چیسی کی پیداوار میں اضافہ کرے گا، کئی مقامی آٹو میکرز کے ساتھ معاہدہ کرنے کے بعد۔ اس کابیڈراک چیسی اس ہفتے یورپ میں میونخ کے آئی اے اے موبیلیٹی شو میں متعارف کرایا گیا۔

تاہم یہ کہ چین کی ای وی ٹیکنالوجی کے باہمی فوائد طویل مدتی میں برقرار رہیں گے یا نہیں، ایک کلیدی سوال ہے۔

ایسٹن مارٹن کے سابق سی ای او اینڈی پامر نے کہا کہ اگرچہ آر اینڈ ڈی میں بچتیں ہیں، آٹو میکرز کو تیسرے فریق کی ٹیکنالوجی پر زیادہ انحصار سے گریز کرنا چاہیے۔

اینڈی پامر نے کہا کہ طویل مدت میں آپ پھنس جائیں گے کیونکہ آپ صرف ایک ریٹیلر رہ جاتے ہیں۔

اولیور وائی مین کے سانتینو نے کہا کہ روایتی آٹو میکرز کے لیے سب سے بڑا خطرہ یہ ہے کہ کسی اور کی ٹیکنالوجی استعمال کرنے کا مطلب ہے کہ آپ کی اپنے برانڈ کو مختلف کرنے کی صلاحیت واقعی محدود ہے۔

سانتینو نے مزید کہا کہ اپنی ٹیکنالوجی ملا کر، آٹو میکرز خطرے کو محدود کر سکتے ہیں۔