کراچی میں موسلادھار بارشیں، محکمہ موسمیات کا شہری سیلاب کے خدشے کا انتباہ

منگل کو علی الصبح شروع ہونے والی بارشیں دن بھر کراچی کے مختلف علاقوں کو متاثر کرتی رہیں، جبکہ محکمہ موسمیات نے اگلے روز تک شہر قائد میں مزید موسلادھار بارشوں کی پیشگوئی کی ہے۔

بارش سے متاثرہ علاقوں میں صدر، گُرومندر، لیاقت آباد، گولیمار، گلشنِ اقبال، گلستانِ جوہر، نارتھ کراچی اور ناظم آباد شامل ہیں۔ ہلکی بارش شارع فیصل، ڈیفنس، قیوم آباد، ملیر، لانڈھی، قائد آباد، کیماڑی اور کورنگی میں بھی ہوئی جس سے موسم خوشگوار ہو گیا ہے۔

محکمہ موسمیات نے آج اور کل کے لیے موسلادھار بارشوں کا الرٹ جاری کرتے ہوئے خبردار کیا ہے کہ کراچی کے قریب سے گزرنے والا سسٹم 100 ملی میٹر سے زائد بارش برسا سکتا ہے۔ ادارے نے شہر میں شہری سیلاب کے خطرے سے بھی آگاہ کیا ہے۔

محکمہ موسمیات کے مطابق ”گزشتہ روز کا شدید ڈپریشن کمزور ہو کر ڈپریشن میں بدل گیا ہے جو اس وقت وسطی سندھ کے اوپر موجود ہے۔ یہ سسٹم مغرب/جنوب مغرب کی جانب بڑھتا رہے گا اور آئندہ 12 گھنٹوں میں بتدریج مزید کمزور ہو کر نمایاں کم دباؤ میں تبدیل ہو جائے گا۔ اس موسمیاتی سسٹم کے باعث صوبے میں مضبوط مون سون ہوائیں مسلسل داخل ہو رہی ہیں۔“

اس موسمیاتی سسٹم کے زیرِ اثر، محکمہ موسمیات نے بتایا کہ کراچی ڈویژن سمیت سندھ کے مختلف اضلاع، دادو، جامشورو، تھرپارکر، حیدرآباد، ٹھٹھہ، بدین، سانگھڑ اور شہید بے نظیر آباد، میں آندھی اور گرج چمک کے ساتھ شدید، کہیں بہت شدید اور کہیں کہیں غیر معمولی بارشوں کا امکان ہے۔

محکمہ نے خبردار کیا کہ موسلادھار بارشوں سے شہری سیلاب اور نشیبی علاقوں میں پانی جمع ہونے کا خطرہ ہے۔

کراچی کے میئر مرتضیٰ وہاب نے اپنے بیان میں کہا ہے کہ شہر کی تمام اہم سڑکیں اب تک کلیئر ہیں اور کے ایم سی کا عملہ موقع پر موجود ہے۔ انہوں نے بتایا، ”میں اس وقت گلستانِ جوہر سے صفورا کی طرف جا رہا ہوں جہاں شکایات موصول ہوئی تھیں اور صفائی کا کام جاری ہے۔ میں اپنے شہریوں سے اپیل کرتا ہوں کہ غیر ضروری آمد و رفت سے گریز کریں۔“

انہوں نے یہ بھی درخواست کی کہ شہری غیر ضروری سفر نہ کریں تاکہ ٹریفک کی روانی متاثر نہ ہو۔

دریں اثناء مختلف علاقوں کے شہریوں نے بغیر اطلاع کے بجلی کی بندش اور سڑکوں و گلیوں میں پانی جمع ہونے کی شکایات کی ہیں، جس سے ٹریفک جام کی صورتحال پیدا ہوگئی ہے۔

حیدرآباد اور ٹھٹھہ میں موسلادھار بارشیں

حیدرآباد میں رات گئے تک وقفے وقفے سے بارش جاری رہی جس سے کئی علاقے زیرِ آب آ گئے۔ متعدد علاقوں میں بجلی کی فراہمی معطل رہی۔ ڈپٹی کمشنر حیدرآباد نے اعلان کیا کہ تمام سرکاری و نجی تعلیمی ادارے آج بند رہیں گے۔

ٹھٹھہ میں شدید بارشوں نے نکاسیٔ آب کا نظام درہم برہم کر دیا اور نشیبی علاقے پانی میں ڈوب گئے۔ سیلاب متاثرین جو پہلے ہی کھلے آسمان تلے زندگی گزارنے پر مجبور تھے، مسلسل بارشوں کے باعث مزید مشکلات کا شکار ہو گئے ہیں۔