انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔
کاروبار کے اختتام پر ڈالر کے مقابلے روپیہ ایک پیسے کی بہتری سے 281.61 روپے پر جاپہنچا۔
واضح رہے کہ یہ مسلسل 23 واں روز ہے جب ڈالر روپے کے مقابلے تنزلی کا شکار رہا۔
یاد رہے کہ پیر کو مقامی کرنسی 281.62 روپے پر بند ہوئی تھی۔
عالمی سطح پر منگل کو امریکی ڈالر تقریباً سات ہفتوں کی کم ترین سطح تک گر گیا کیونکہ سرمایہ کار ایسے امریکی اعداد و شمار میں ممکنہ ترامیم کے منتظر ہیں جو یہ ظاہر کر سکتی ہیں کہ روزگار کی منڈی کی صورتحال ابتدائی اندازوں سے بھی زیادہ خراب ہے۔ اس پیش رفت نے فیڈرل ریزرو کی جانب سے مزید بڑی شرح سود میں کٹوتیوں کے امکانات کو تقویت دی ہے۔
ایشیا میں منگل کو امریکی ڈالر انڈیکس 24 جولائی کے بعد اپنی کم ترین سطح 97.344 تک گر گیا، یہ کمی ان ابتدائی بینچ مارک ترامیم سے قبل دیکھی گئی جو اپریل 2024 سے مارچ 2025 کے دوران کے روزگار کے اعداد و شمار سے متعلق ہیں۔
ماہرینِ معیشت کو توقع ہے کہ تقریباً 8 لاکھ ملازمتوں میں کمی کی نشاندہی کی جا سکتی ہے، جو اس بات کا عندیہ دے گی کہ فیڈرل ریزرو زیادہ سے زیادہ روزگار کے ہدف کے حصول کی کوششوں میں تاخیر کا شکار ہے۔
دی وال اسٹریٹ جرنل کی منگل کی رپورٹ کے مطابق ٹرمپ انتظامیہ کے مشیروں نے لیبر اسٹیٹسٹکس بیورو کی مبینہ خامیوں پر مشتمل ایک رپورٹ تیار کرنا شروع کر دی ہے جو آنے والے ہفتوں میں شائع کی جا سکتی ہے۔ یہ بات نام ظاہر نہ کرنے والے ذرائع کے حوالے سے بتائی گئی۔
گزشتہ ماہ امریکی صدر ڈونلڈ ٹرمپ نے بی ایل ایس کی کمشنر ایریکا میک اینٹارفر کو برطرف کر دیا تھا اور ان پر بغیر کسی ثبوت کے روزگار سے متعلق اعداد و شمار میں جعل سازی کا الزام عائد کیا تھا۔
Comments
Comments are closed.