علی بابا ڈاٹ کام کا پاکستان میں ٹریڈ ایشورنس 2.0 کا آغاز، نمایاں برآمدکنندگان کو خراجِ تحسین

علی بابا ڈاٹ کام جو دنیا کا معروف بزنس ٹو بزنس (بی ٹو بی) ای کامرس پلیٹ فارم ہے نے پاکستان میں ٹریڈ ایشورنس 2.0 سروس کا آغاز کرتے ہوئے ملک کے نمایاں ای کامرس کاروباروں کو کے ای ایل ایوارڈز 2025 کی تقریب میں خراجِ تحسین پیش کیا۔ تقریب میں اہم صنعتی رہنماؤں نے شرکت کی جن میں سی سی سی آئی کے نائب صدر عمر خالد اور نیشنل انکیوبیشن سینٹر اسلام آباد کے پروجیکٹ ڈائریکٹر سید احمد مسعود شامل تھے۔

ٹریڈ ایشورنس 2.0 اس تقریب کا نمایاں حصہ رہا جس میں پاکستانی برآمدکنندگان کو عالمی منڈی میں زیادہ مؤثر اور محفوظ تجارت کے لیے جدید سہولتیں فراہم کی گئیں، ان سہولتوں میں کم ٹرانزیکشن فیس، مفت رقم نکالنے کی سہولت، زیادہ آرڈر اور کریڈٹ لمٹس اور متنوع ادائیگی کے طریقے شامل ہیں۔

علی بابا ڈاٹ کام کی گلوبل سپلائی چین سروسز کی سربراہ سمر گاؤ نے کہا کہ پاکستان ایک بھرپور صلاحیت رکھنے والی سپلائر مارکیٹ ہے، جہاں مضبوط پیداواری صلاحیت اور متنوع مصنوعات عالمی خریداروں کی توجہ حاصل کر رہی ہیں۔ اس موقع سے فائدہ اٹھانے کے لیے ہم نے ٹریڈ ایشورنس 2.0 کو اس طرح اپ گریڈ کیا ہے کہ سپلائرز لاگت اور کریڈٹ سے متعلق چیلنجز پر قابو پاتے ہوئے زیادہ قدر والے آرڈرز حاصل کرسکیں اور اپنی عالمی سرگرمیوں میں تیز رفتار ترقی کر سکیں۔

کے ای ایل ایوارڈز 2025 میں پاکستان کی 6 سرکردہ ای کامرس کمپنیوں کو نمایاں کارکردگی پر سراہا گیا۔ فائنلسٹس نے علی بابا ڈاٹ کام پلیٹ فارم پر کامیابی کے حصول کی حکمتِ عملیوں پر بصیرت افروز پریزنٹیشنز پیش کیں۔ تقریب میں مختلف شعبوں ملبوسات سے لے کر سرجیکل آلات تک کے بہترین ایکسپورٹرز کو دو کیٹیگریز میں ایوارڈز سے نوازا گیا: گلوبل ٹریڈ انوویٹرز اور ای کامرس ایکسپورٹ ماسٹرز۔