فیلڈ مارشل عاصم منیر کی جنوبی بلوچستان کی ترقی کیلئے بھرپور حمایت کی یقین دہانی

پاک فوج نے جنوبی بلوچستان میں سماجی و معاشی ترقی اور امن و استحکام کے لیے اٹھائے جانے والے تمام اقدامات کی بھرپور حمایت کے عزم کا اعادہ کیا ہے۔

آئی ایس پی آر کے مطابق چیف آف آرمی اسٹاف فیلڈ مارشل سید عاصم منیر نے بلوچستان کے علاقے تربت کا دورہ کیا، جہاں انہیں موجودہ سیکیورٹی صورتحال، ’’فتنۂ ہندوستان‘‘ کے خلاف کامیاب آپریشنز، جاری ترقیاتی منصوبوں اور خطے میں معاشی و سماجی بہتری کے اقدامات پر تفصیلی بریفنگ دی گئی۔

آرمی چیف نے سول انتظامیہ کے نمائندوں سے ملاقات میں بہتر طرزِ حکمرانی، انفرااسٹرکچر کی ترقی اور عوامی شمولیت پر مبنی جامع ترقی کی ضرورت پر زور دیا۔

انہوں نے کہا کہ بلوچستان کے عوام کو درپیش مسائل کے حل کے لیے سول و عسکری اداروں کی مشترکہ کوششیں ناگزیر ہیں۔

فیلڈ مارشل عاصم منیر نے واضح کیا کہ پاکستان آرمی امن، خوشحالی اور پائیدار ترقی کی جدوجہد میں بلوچستان کے عوام کے شانہ بشانہ کھڑی ہے۔

آئی ایس پی آر کے مطابق پاکستان میں دہشت گردی کی سرگرمیوں میں حالیہ اضافہ، خصوصاً خیبرپختونخوا اور بلوچستان میں، سنگین چیلنج ہے۔

اس سے قبل ڈی جی آئی ایس پی آر لیفٹیننٹ جنرل احمد شریف چوہدری نے عوام پر زور دیا تھا کہ وہ دہشت گردوں اور ان کے سہولت کاروں کو بے نقاب کریں اور اس مقصد کے لیے سیکیورٹی فورسز اور انتظامیہ کے ساتھ بھرپور تعاون کریں۔

لیفٹیننٹ جنرل احمد شریف چوہدری نے کہا کہ بلوچستان کے عوام دہشت گردی کے خلاف ڈٹ کر کھڑے ہو رہے ہیں اور اب وہ دہشت گردوں اور ان کے سہولت کاروں کی نشاندہی بھی کر رہے ہیں۔

انہوں نے کہا کہ وہ ان دہشت گردوں سے تنگ آ چکے ہیں۔ بلوچستان جائیں اور دیکھیں کہ بلوچ عوام کس قدر باشعور اور دوراندیش ہیں۔

ڈی جی آئی ایس پی آر نے یہ بھی یاد دلایا کہ ہر روز پاکستانی افسران، جوان اور شہری ملک کے تحفظ کے لیے اپنی جانوں کے نذرانے پیش کر رہے ہیں۔