پاکستان اور بنگلہ دیش کے درمیان صنعتی تعاون پر مذاکرات

وفاقی وزیر تجارت جام کمال خان نے جمعرات کو ڈھاکہ میں بنگلہ دیش کے مشیر برائے صنعت، عادل الرحمٰن خان سے اعلیٰ سطح مذاکرات کیے تاکہ دونوں ممالک کے درمیان صنعتی تعاون، مشترکہ منصوبوں اور علم کے تبادلے کے مواقع تلاش کیے جا سکیں۔

ملاقات کے دوران دونوں رہنمائوں نے اس بات پر زور دیا کہ دونوں ممالک اپنی معاشی اور صنعتی بنیادوں کو باہمی فائدے کے لیے بروئے کار لاتے ہوئے غذائی تحفظ کے مسائل، فوڈ انڈسٹری میں ویلیو ایڈیشن، اور صنعتی ٹیکنالوجی کو ہم آہنگ کرنے پر توجہ دیں۔

گفتگو میں مختلف شعبوں میں مہارت کے تبادلے، وفود کے باہمی تبادلے اور علم کی شراکت پر توجہ مرکوز کی گئی۔ جام کمال نے اس عزم کا اظہار کیا کہ پاکستان بنگلہ دیش کے ترقی کرتے ہوئے صنعتی منظرنامے میں تعاون، مشترکہ منصوبوں اور باہمی سرمایہ کاری کے ذریعے شراکت دار بننے میں گہری دلچسپی رکھتا ہے۔

انہوں نے اس بات پر زور دیا کہ ایک مشترکہ وژن کے ذریعے صنعتی ترقی کے لیے سہولت فراہم کرنے والے معاشی نظام کی تشکیل ضروری ہے۔ وزیر تجارت نے ویلیو ایڈڈ صنعتوں پر توجہ دینے کی ضرورت اجاگر کی تاکہ ریونیو میں اضافہ اور سماجی و معاشی ترقی ممکن ہو سکے۔ ساتھ ہی انہوں نے بنگلہ دیش کی فارماسیوٹیکلز، ٹیکسٹائل اور آئی ٹی کے شعبوں میں ترقی کو سراہا۔

ادھر بنگلہ دیش کے مشیر نے اپنے ملک کی صنعتی ترقی کو اجاگر کیا اور بنگلہ دیش کی بڑھتی ہوئی صنعتی ضروریات کا اعتراف کیا۔ انہوں نے علم کے تبادلے اور صنعتی تعاون میں گہری دلچسپی ظاہر کی اور چمڑے، شپ بلڈنگ، شوگر، ایگرو پروسیسنگ اور ایس ایم ایز کو ممکنہ تعاون کے شعبوں کے طور پر شناخت کیا۔

ملاقات کے اختتام پر دونوں فریقین نے دوطرفہ تجارت اور صنعتی ترقی کو تعاون پر مبنی اقدامات کے ذریعے آگے بڑھانے کے عزم کا اظہار کیا۔

جام کمال خان بدھ کے روز ڈھاکہ پہنچے تاکہ 21 سے 24 اگست 2025 تک جاری رہنے والے اپنے چار روزہ سرکاری دورے کا آغاز کر سکیں۔

یہ دورہ پاکستان اور بنگلہ دیش کے درمیان تجارتی تعلقات کو مضبوط بنانے اور اقتصادی تعاون کو فروغ دینے کے لیے کیا جا رہا ہے، جیسا کہ جمعرات کو جاری ایک سرکاری بیان میں کہا گیا۔

ڈھاکہ پہنچنے پر جام کمال کا استقبال بنگلہ دیش کے مشیر برائے تجارت بشیر الدین اور پاکستان کے ہائی کمشنر عمران حیدر نے کیا۔

اپنے قیام کے دوران، وزیر تجارت بنگلہ دیشی ہم منصب، اعلیٰ حکومتی عہدیداروں اور نمایاں کاروباری نمائندوں سے اعلیٰ سطح ملاقاتیں کریں گے تاکہ تجارت اور سرمایہ کاری میں تعاون کے نئے مواقع تلاش کیے جا سکیں۔

اس سے قبل، رواں ماہ کے آغاز میں جام کمال اور بنگلہ دیش کے پاکستان میں ہائی کمشنر اقبال حسین خان نے تجارت، توانائی، لاجسٹکس اور صنعتی روابط میں دوطرفہ تعاون کو مزید گہرا کرنے کے امکانات پر تبادلہ خیال کیا تھا۔