نجکاری کمیشن نے زیڈ ٹی بی ایل کی فروخت کے لیے مالی مشاورتی معاہدے پر دستخط کر دیے

نجکاری کمیشن (پی سی) نے زرعی ترقیاتی بینک لمیٹڈ (زیڈ ٹی بی ایل) کی نجکاری کے لیے نیکسٹ کیپیٹل لمیٹڈ کی قیادت میں قائم کنسورشیم کے ساتھ مالیاتی مشاورتی خدمات کے معاہدے (ایف اے ایس اے) پر دستخط کر دیے ہیں۔ یہ بات نجکاری کمیشن نے جمعہ کو ایک بیان میں بتائی ہے۔

بیان کے مطابق اس کنسورشیم میں ماہر اداروں کو یکجا کیا گیا ہے جن میں اعجاز احمد اینڈ ایسوسی ایٹس، بیکر ٹلی محمود ادریس قمر، ایگزیکٹوز نیٹ ورک انٹرنیشنل، برج پبلک ریلیشنز، سویولز پاکستان (پرائیویٹ) لمیٹڈ اور پریما گلوبل کنسلٹنگ (پرائیویٹ) لمیٹڈ شامل ہیں۔

پی سی نے کہا، ”یہ اقدام نجی شعبے کی سرمایہ کاری کو فروغ دینے، بینکاری نظام کو جدید بنانے اور سرکاری ملکیتی اداروں (ایس او ایز) کی طویل المدتی پائیداری کو یقینی بنانے کے لیے حکومت کے غیر متزلزل عزم کا مظہر ہے۔“

اس سے بھی بڑھ کر، یہ قدم زیڈ ٹی بی ایل کو ایسے وسائل، سرمایہ اور لچک فراہم کرنے کی جانب ایک فیصلہ کن پیش رفت ہے، جو پاکستان کے کسانوں اور زرعی کاروباروں کو پہلے سے کہیں زیادہ مؤثر انداز میں بااختیار بنانے کے لیے ضروری ہیں۔

حکومت کا موقف ہے کہ زیڈ ٹی بی ایل کی نجکاری سے چھوٹے کسانوں اور دیہی برادریوں کو تیز تر اور آسان قرضوں کی فراہمی ممکن ہو سکے گی۔

زیڈ ٹی بی ایل کی نجکاری کا مقصد زرعی فنانس میں اس کی طویل عرصے سے حاصل کردہ مہارت کو نجی شعبے کی کارکردگی کے ساتھ جوڑ کر پاکستان کے زرعی شعبے میں سرمایہ کاری کو فروغ دینا ہے، تاکہ دیہی خوشحالی کو یقینی بنایا جا سکے اور کسانوں کو بروقت مالی وسائل میسر آ سکیں۔“

اس ایف اے ایس اے پر دستخط نجکاری کے عمل کا پہلا اہم سنگ میل ہے۔ اس معاہدے کے تحت، مالی مشیر فروخت سے متعلق جانچ پڑتال ( ڈیو ڈیلیجنس) کرے گا، مارکیٹ کے رجحانات کا جائزہ لے گا، ممکنہ سرمایہ کاروں سے رابطہ کرے گا، سودے کا ڈھانچہ ترتیب دے گا، سرمایہ کاروں کے سامنے اس کی تشہیر کرے گا، اور ایک شفاف بولی کے عمل میں نجکاری کمیشن کی معاونت کرے گا۔