پیٹرول مہنگا، ڈیزل سستا ہونے کا امکان

آئل اینڈ گیس ریگولیٹری اتھارٹی (اوگرا) کے اعداد و شمار کی بنیاد پر آپٹیمس کیپیٹل مینجمنٹ کی پیش گوئی کے مطابق 16 اگست 2025 سے شروع ہونے والے دو ہفتوں کے دوران پیٹرولیم مصنوعات کی قیمتوں میں نمایاں کمی متوقع ہے۔

اعدادوشمار کے مطابق ہائی اسپیڈ ڈیزل (ایچ ایس ڈی) کی قیمت میں فی لیٹر 12.91 روپے کی کمی متوقع ہے جس سے ڈیزل کی قیمت 285.83 روپے سے کم ہو کر 272.92 روپے فی لیٹر ہو جائے گی۔

اس کمی کی وجہ ایکس ریفائنری قیمت میں نمایاں کمی ہے جو 183.57 روپے سے گھٹ کر 170.66 روپے فی لیٹر ہوگئی ہے۔

اس کے برعکس، پیٹرول کی قیمت میں فی لیٹر 1.04 روپے کا اضافہ متوقع ہے جس سے پیٹرول کی نئی قیمت 264.61 روپے سے بڑھ کر 265.65 روپے فی لیٹر ہو جائے گی، اس اضافے کی بنیادی وجہ ایکس ریفائنری قیمت میں اضافہ ہے جو 158.88 روپے سے بڑھ کر 159.92 روپے فی لیٹر ہوگئی ہے۔

دریں اثنا، دیگر لاگت کے عناصر جیسے کہ مارجن، لیویز اور اندرون ملک فریٹ ایکویلائزیشن میں کوئی تبدیلی نہیں کی گئی ہے۔

پیٹرولیم لیوی پیٹرول پر 78.02 روپے فی لیٹر اور ڈیزل پر 77.01 روپے فی لیٹر برقرار ہے جبکہ دونوں ایندھن کی اقسام پر فی الحال کوئی سیلز ٹیکس لاگو نہیں کیا گیا ہے۔

اگر اس کی منظوری دی گئی تو یہ ترمیم حکومت کے دوہفتہ وار قیمتوں کے طریقہ کار کے مطابق نافذ کی جائے گی، جو عالمی تیل کی قیمتوں اور کرنسی کی شرح میں اتار چڑھاؤ کی عکاسی کرتا ہے۔