چین کی دہشتگردی کے خلاف پاکستان کے کردار کی تعریف

چین نے دہشت گردی کے خلاف جنگ میں پاکستان کی مسلح افواج کے کردار کو تسلیم کرتے ہوئے ہمسایہ ملک کے ساتھ اپنی اسٹریٹجک شراکت داری پر غیر متزلزل حمایت اور عزم کا اعادہ کیا ہے۔

آئی ایس پی آر کی جانب سے جاری کردہ اعلامیے کے مطابق یہ بات پاکستان میں چین کے سفیر جیانگ زائی ڈونگ نے کہی، جو آج جی ایچ کیو میں چین کی پیپلز لبریشن آرمی (پی ایل اے) کے 98 ویں یومِ تاسیس کی تقریب کے مہمانِ خصوصی تھے۔

تقریب سے خطاب کرتے ہوئے چیف آف آرمی اسٹاف فیلڈ مارشل سید عاصم منیر نے پی ایل اے کے دفاع، سلامتی اور قومی تعمیر میں کلیدی کردار کو سراہا۔

آئی ایس پی آر کے مطابق آرمی چیف نے پاک چین تعلقات کی طاقت اور اسٹریٹجک اہمیت پر زور دیتے ہوئے کہا کہ دونوں ممالک کے درمیان رشتہ منفرد، آزمودہ اور بدلتے ہوئے علاقائی و عالمی حالات کے باوجود غیر معمولی حد تک مضبوط ہے۔

جنرل عاصم منیر نے مزید کہا کہ پاکستان اور چین کی اسٹریٹجک شراکت داری باہمی اعتماد، غیر متزلزل حمایت اور مشترکہ عزم کی بہترین مثال ہے۔

انہوں نے کہا کہ اسٹریٹجک حالات میں تبدیلی کے باوجود دونوں ممالک کی دوستی مضبوط اور ناقابل تسخیر رہی ہے۔

آئی ایس پی آر کے مطابق، آرمی چیف نے کہا کہ پاکستان آرمی اور پی ایل اے حقیقی معنوں میں ایک دوسرے کے بھائی ہیں۔ ان کی دیرینہ شراکت داری علاقائی استحکام کو فروغ دینے اور مشترکہ اسٹریٹجک مفادات کے تحفظ میں کلیدی کردار ادا کرتی رہے گی۔