پاکستان پہلی بار امریکی خام تیل درآمد کرے گا، سینرجیکو سے معاہدہ ہوگیا

پاکستان کی سب سے بڑی ریفائنری کمپنی سینرجیکو (Cnergyico) اکتوبر میں وِٹول سے 10 لاکھ بیرل خام تیل درآمد کرے گی، کمپنی کے نائب چیئرمین اسامہ قریشی نے جمعہ کو رائٹرز کو بتایا۔ یہ معاہدہ پاکستان کی جانب سے امریکی خام تیل کی تاریخ میں پہلی خریداری ہے، جو ایک تاریخی تجارتی معاہدے کے تحت عمل میں آئی ہے۔

اسامہ قریشی نے بتایا کہ ویسٹ ٹیکساس انٹرمیڈیٹ (ڈبلیو ٹی آئی) ہلکے خام تیل کا کارگو اس مہینے ہیوسٹن سے لوڈ کیا جائے گا اور اکتوبر کے دوسرے نصف میں کراچی پہنچنے کی توقع ہے۔ انہوں نے کہا کہ یہ ہمارے وِٹول کے ساتھ کیے گئے امبریلا ٹرم ایگریمنٹ کے تحت ایک آزمائشی اسپاٹ کارگو ہے۔ اگر یہ تجارتی لحاظ سے فائدہ مند اور دستیاب رہا، تو ہم ہر ماہ کم از کم ایک کارگو درآمد کر سکتے ہیں۔

انہوں نے مزید کہا کہ یہ معاہدہ کئی مہینوں پر محیط مذاکرات کے بعد طے پایا، جو سب سے پہلے اپریل میں اس وقت شروع ہوئے جب امریکی صدر ڈونلڈ ٹرمپ نے پاکستان سے درآمدات پر 29 فیصد ٹیرف لگانے کی دھمکی دی تھی۔