کراچی میں سی ٹی ڈی کی کارروائی، مطلوب ترین دہشت گرد سمیت 3 ہلاک

** آج نیوز کے مطابق پولیس کے کاؤنٹر ٹیررازم ڈپارٹمنٹ (سی ٹی ڈی) نے خفیہ انٹیلی جنس ایجنسی کے ساتھ مشترکہ کارروائی میں تین مشتبہ دہشت گردوں کو فائرنگ کے تبادلے میں ہلاک کر دیا۔**

سی ٹی ڈی کے مطابق کارروائی ایک خفیہ اطلاع پر شروع کی گئی تھی کہ کراچی کے منگھوپیر علاقے میں ایک گھر میں کالعدم تنظیم کے دہشت گرد موجود ہیں۔ چھاپے کے دوران قانون نافذ کرنے والے اداروں اور دہشت گردوں کے درمیان فائرنگ کا تبادلہ ہوا جس میں تین دہشت گرد مارے گئے۔

سی ٹی ڈی انچارج راجہ عمر خطاب نے تصدیق کی کہ یہ کارروائی انٹیلی جنس رپورٹس کی بنیاد پر کی گئی تھی جن میں کالعدم تنظیم کے افراد کی موجودگی کی اطلاع دی گئی تھی۔ انہوں نے مزید کہا کہ یہ آپریشن شہر سے دہشت گردی کے خاتمے کی جاری کوششوں کا حصہ ہے۔

راجہ عمر خطاب نے بتایا کہ مارے گئے دہشت گردوں میں سے ایک کی شناخت زعفران کے نام سے ہوئی ہے، دوسرے کی قدرت اللہ جبکہ تیسرے کی شناخت کی جا رہی ہے۔

انہوں نے کہا کہ مارے گئے دہشت گرد زعفران کے سر پر حکومت نے 2 کروڑ روپے کا انعام رکھا ہوا تھا۔

کارروائی کے دوران گھر سے دھماکہ خیز مواد، دستی بم، ایس ایم جیز اور دیگر سامان برآمد کیا گیا۔ ہلاک دہشت گردوں کی لاشوں کو ضابطے کی کارروائی کے لیے سول اسپتال کراچی منتقل کر دیا گیا۔

پولیس کا کہنا ہے کہ گھر میں موجود تمام دہشت گرد مارے جا چکے ہیں اور اب اس مکان کے مالک کے بارے میں مزید معلومات حاصل کی جا رہی ہیں جہاں یہ دہشت گرد مقیم تھے۔