پاکستان اور عرب امارات کے درمیان سفارتی و سرکاری پاسپورٹ ہولڈرز کے لیے ویزا فری انٹری کا آغاز

پاکستان اور متحدہ عرب امارات کے درمیان سفارتی اور سرکاری پاسپورٹ رکھنے والے شہریوں کے لیے ویزا چھوٹ کا معاہدہ باضابطہ طور پر نافذ ہو گیا ہے جس کے بعد دونوں ممالک کے درمیان سفر کیلئے ویزا کی ضرورت ختم ہوگئی ہے۔

نائب وزیرِاعظم اوروزیرِخارجہ اسحاق ڈار نے اس پیش رفت کا اعلان کرتے ہوئے بتایا کہ یہ معاہدہ 24 جون 2025 کو ابو ظہبی میں یو اے ای کے نائب وزیرِاعظم و وزیرِخارجہ شیخ عبداللہ بن زاید النہیان کے ساتھ ملاقات کے دوران طے پایا تھا۔

یہ ویزا چھوٹ 25 جولائی 2025 سے مؤثر ہوئی اور اب پاکستان اور یو اے ای کے تمام بین الاقوامی ہوائی اڈوں پر اس پر باقاعدہ عملدرآمد جاری ہے۔

سماجی رابطے کی ویب سائٹ ایکس پر ایک پیغام میں وزیرِخارجہ اسحاق ڈار نے کہا کہ مجھے یہ اطلاع دیتے ہوئے خوشی ہے کہ متحدہ عرب امارات کے حکام نے تصدیق کی ہے کہ پاکستانی سفارتی اور سرکاری پاسپورٹ ہولڈرز کے لیے ویزا چھوٹ کا نفاذ ہو چکا ہے۔

اسی طرح یو اے ای کے شہریوں کے لیے بھی پاکستان کے تمام ہوائی اڈوں پر باہمی بنیادوں پر یہی سہولت فعال کر دی گئی ہے۔

اس سے قبل 25 جون کو اسحاق ڈار نے ایک اور پوسٹ میں بتایا تھا کہ پاکستان اور یو اے ای کے درمیان 3اہم مفاہمتی یادداشتوں پر دستخط ہوئے: سفارتی و سرکاری پاسپورٹ رکھنے والوں کے لیے ویزا استثنا، مصنوعی ذہانت اور ڈیجیٹل معیشت میں تعاون، اور مشترکہ سرمایہ کاری کے فروغ کے لیے اشتراک، جو دونوں برادر ممالک کے تعلقات کو مزید مضبوط بنانے میں مددگار ثابت ہوں گے۔

گزشتہ ماہ ہونے والی ملاقات میں دونوں وزرائے خارجہ نے دوطرفہ تعاون کے مختلف شعبوں — خصوصاً تجارت، سرمایہ کاری، توانائی، بنیادی ڈھانچے کی ترقی اور انفارمیشن ٹیکنالوجی — میں شراکت داری کے نئے امکانات پر بھی غور کیا۔