اسلام آباد۔لاہور موٹروے پر بس الٹنے سے 8 افراد جاں بحق، 18 زخمی

اتوار کی صبح ایم-2 موٹروے پر بلکسر انٹرچینج کے قریب مسافر بس الٹنے سے کم از کم 8 افراد جاں بحق اور 18 زخمی ہو گئے، ریسکیو حکام نے واقعہ کی تصدیق کی ہے۔

حادثہ مقامی وقت کے مطابق صبح 7 بجکر13 منٹ پر پیش آیا جب اسلام آباد سے لاہور جانے والی بس کا اگلا بایاں ٹائر پھٹ گیا، جس کے باعث ڈرائیور گاڑی پر قابو نہ رکھ سکا۔

ریسکیو 1122 کے چکوال ڈسٹرکٹ حکام نے بتایا بس میں اندازاً 35 سے 40 مسافر سوار تھے۔ بلکسر انٹرچینج کے قریب بس الٹ گئی۔ ایمرجنسی ریسپانڈرز، جن میں چھ ریسکیو گاڑیاں اور پانچ ایمبولینسیں شامل تھیں، فوری طور پر جائے حادثہ پر روانہ کی گئیں اور پانچ منٹ کے اندر پہنچ گئیں۔

حتمی ایمرجنسی ڈیٹا کے مطابق حادثے میں 8 افراد جاں بحق ہوئے جن میں 14 سالہ لڑکی، 2 سالہ بچہ اور 8 ماہ کا شیرخوار شامل ہیں۔ 18 دیگر مسافروں کو سر پر چوٹیں، فریکچر اور خراشوں سمیت مختلف زخم آئے۔

زخمیوں اور جاں بحق افراد کو کلر کہار ٹراما سینٹر اور ڈسٹرکٹ ہیڈکوارٹرز اسپتال (ڈی ایچ کیو) چکوال منتقل کر دیا گیا۔

موٹروے پولیس اور ریسکیو ٹیموں نے بس کو کرین کی مدد سے ہٹا کر اور مستحکم کر کے ریکوری آپریشن مکمل کیا۔

موقع پر کسی زخمی کو ابتدائی طبی امداد نہیں دی گئی کیونکہ تمام زخمیوں کو مزید علاج کے لیے منتقل کیا گیا ہے۔