شدید مون سون بارشیں، ملک بھر میں جاں بحق ہونے والوں کی تعداد 200 سے تجاوز کر گئی

نیشنل ڈیزاسٹر مینجمنٹ اتھارٹی (این ڈی ایم اے) نے بتایا کہ اتوار تک ملک بھر میں موسلادھار بارشوں اور سیلاب کے باعث اب تک 200 سے زائد افراد جاں بحق اور 562 زخمی ہو چکے ہیں، ۔

تازہ ترین صورتحال رپورٹ کے مطابق مون سون بارشوں کے آغاز سے اب تک مجموعی ہلاکتوں کی تعداد 203 ہے، جن میں 69 مرد، 37 خواتین اور 97 بچے شامل ہیں۔ زخمیوں کی تعداد 562 ہو گئی ہے، جن میں 223 مرد، 157 خواتین اور 182 بچے شامل ہیں۔

گزشتہ 24 گھنٹوں کے دوران مختلف علاقوں سے بارش سے متعلقہ واقعات میں مزید 10 افراد جاں بحق اور 18 زخمی ہوئے۔

پنجاب سب سے زیادہ متاثرہ صوبہ رہا، جہاں 123 ہلاکتیں اور 454 زخمی رپورٹ ہوئے۔ اس کے بعد خیبر پختونخوا میں 41 ہلاکتیں اور 58 زخمی، جبکہ سندھ میں 21 ہلاکتیں اور 40 زخمی رپورٹ ہوئے۔ بلوچستان میں 16 ہلاکتیں اور 4 زخمی ہوئے، جبکہ آزاد جموں و کشمیر اور اسلام آباد کیپیٹل ٹیریٹری میں ایک ایک ہلاکت رپورٹ ہوئی۔ گلگت بلتستان میں کسی جانی نقصان کی اطلاع نہیں ملی۔

سیلابی الرٹس جاری

این ڈی ایم اے نے محکمہ موسمیات کے تعاون سے دریائے سندھ اور دریائے جہلم کے لیے متعدد سیلابی اور بارش کی وارننگز جاری کی ہیں۔

فلڈ فورکاسٹنگ ڈویژن کے مطابق منگلا پر دریائے جہلم اور مرالہ پر دریائے چناب میں پانی کی سطح بڑھ رہی ہے، جس سے ملحقہ اضلاع میں سیلاب کا خطرہ ہے۔

این ڈی ایم اے نے صوبائی اور ضلعی انتظامیہ کو ہدایت دی ہے کہ وہ ہائی الرٹ پر رہیں اور خصوصاً پنجاب اور خیبرپختونختونخوا کے سیلاب سے متاثرہ علاقوں میں حفاظتی انخلا کے اقدامات کریں۔ بڑے شہروں، بشمول لاہور، پشاور اور کراچی میں شہری سیلاب کی اطلاعات بھی موصول ہوئی ہیں۔

مزید برآں، محکمہ موسمیات پاکستان نے اگلے 24 گھنٹوں میں سندھ کے مختلف شہروں میں بارش، تیز ہوا اور گرج چمک کے طوفان کے ساتھ بعض مقامات پر شدید بارش کی پیشگوئی کی ہے۔ متاثرہ شہروں اور اضلاع میں کراچی، حیدرآباد، سکھر، ٹھٹھہ، بدین، لاڑکانہ، جیکب آباد، نوابشاہ اور میرپور خاص شامل ہیں۔