دیوان فاروق موٹرز لمیٹڈ (ڈی ایف ایم ایل) نے الیکٹرک وہیکل کی تیاری کے آغاز کے بعد ابتدائی دس ماہ میں چینی الیکٹرک گاڑی ’ہونری-وی ای‘ (Honri-VE) کے 300 سے زائد یونٹس مقامی طور پر اسمبل کر لیے ہیں۔
منگل کے روز پاکستان اسٹاک ایکسچینج (پی ایس ایکس) کو جاری کردہ نوٹیفکیشن میں کمپنی نے بتایا کہ اب تک 300 سے زائد گاڑیاں ایکو گرین موٹرز لمیٹڈ کے حوالے کی جا چکی ہیں تاکہ وہ انہیں اپنے صارفین کو فراہم کر سکے۔
نوٹیفکیشن میں کہا گیا کہ ہمارے مورخہ 11 اکتوبر 2024 کے سابقہ خط کے حوالے سے، جس میں معزز ممبران کو آگاہ کیا گیا تھا کہ کمپنی اپنی منسلکہ کمپنی ایکو-گرین موٹرز لمیٹڈ کے لیے ٹول مینوفیکچرنگ کے تحت الیکٹرک گاڑیاں (ہونری-وی ای) اسمبل کر رہی ہے، ہم یہ بتانا چاہتے ہیں کہ اب تک 300 سے زائد گاڑیاں کامیابی سے اسمبل کی جا چکی ہیں اور ایکو-گرین موٹرز کے حوالے کی جا چکی ہیں۔“
اس پیشرفت کے بعد ڈی ایف ایم ایل کے شیئر کی قیمت میں نمایاں اضافہ ہوا اور یہ 1.43 روپے (4.02 فیصد) اضافے کے ساتھ 36.99 روپے تک پہنچ گئی۔
ڈی ایف ایم ایل نے ستمبر 2024 میں اعلان کیا تھا کہ اسے انجینئرنگ ڈیولپمنٹ بورڈ (ای ڈی بی) سے منظوری ملنے کے بعد اس کی اسمبلی پلانٹ میں الیکٹرک گاڑیوں کی پیداوار شروع کر دی گئی ہے۔
جون 2023 میں کمپنی نے اعلان کیا تھا کہ اس نے ایکو-گرین موٹرز لمیٹڈ (ای جی ایم ایل) کے ساتھ ٹول مینوفیکچرنگ معاہدہ کیا ہے تاکہ ای جی ایم ایل کی گاڑی ہونری-وی ای تیار کی جا سکے۔
اس معاہدے کے تحت ایک کمپنی مصنوعات کا ڈیزائن یا آئیڈیا رکھتی ہے اور خام مال فراہم کرتی ہے، جبکہ دوسری کمپنی ان مصنوعات یا ان کے پرزہ جات کو تیار کرتی ہے۔
دیوان فاروق موٹرز لمیٹڈ 28 دسمبر 1998 کو پاکستان میں ایک پبلک لمیٹڈ کمپنی کے طور پر قائم کی گئی تھی، اور یہ پاکستان میں گاڑیوں کی اسمبلنگ، تدریجی پیداوار اور فروخت میں مصروف عمل ہے۔
Comments
Comments are closed.