خواتین کی مالی شمولیت کے فروغ کیلئے اے ڈی بی کیساتھ 35 کروڑ ڈالر کا قرض معاہدہ طے

پاکستان اور ایشیائی ترقیاتی بینک (اے ڈی بی) کے درمیان ویمن انکلوسیو فنانس سیکٹر ڈیولپمنٹ پروگرام (سب پروگرام-2) کے لیے 35 کروڑ ڈالر کے قرضے کے معاہدے پر دستخط ہوئے۔

معاہدے پر وزارت اقتصادی امور کی جانب سے ایڈیشنل سیکریٹری سبینہ قریشی اور اے ڈی بی کی جانب سے منصوبے کے ایڈمنسٹریشن یونٹ کے سربراہ دنیشن راج شیوکوٹی نے دستخط کیے جب کہ فنانشل انٹرمیڈیئری لون (ایف آئی ایل) کے لیے پروجیکٹ معاہدے پر اسٹیٹ بینک آف پاکستان کی جانب سے دستخط کیے گئے ۔

اس موقع پر حکومت پاکستان اور ایشیائی ترقیاتی بینک کے سینئر حکام بھی موجود تھے۔ یہ معاہدہ حکومتِ پاکستان کے خواتین کو معاشی طور پر بااختیار بنانے کے عزم کی عکاسی کرتے ہیں۔ اس پروگرام کے ذریعے خواتین کو مالی وسائل تک بہتر رسائی، کاروباری مواقع میں توسیع اور روزگار کے مواقع میں اضافہ ممکن ہوگا، جو خواتین کے لیے ایک جامع اور خوشحال مستقبل کی راہ ہموار کرے گا۔

ویمن انکلوسیو فنانس (ڈبلیو آئی ایف) پروگرام کے سب پروگرام ٹو کی بنیاد ان پالیسی اصلاحات پر رکھی گئی ہے جو سب پروگرام ون کے تحت متعارف کرائی گئی تھیں۔ یہ پروگرام چار اہم اصلاحاتی شعبوں پر مرکوز ہے جن میں خواتین کی مالی شمولیت کے لیے سازگار پالیسی اور ریگولیٹری فریم ورک کی تشکیل، خواتین کے لیے مالیاتی وسائل کی دستیابی میں اضافہ،خواتین کی کاروباری صلاحیتوں کو مضبوط بنانا اور مالیاتی شعبے میں جامع اور برابری پر مبنی ورک پالیسز کو فروغ دینا شامل ہے۔

350 ملین ڈالر کے مجموعی مالیاتی پیکیج (جس میں 300 ملین پالیسی بیسڈ قرض اور 50 ملین فنانشل انٹرمیڈیئری لون شامل ہیں) سے پاکستان کی جامع، پائیدار اور مضبوط ترقی کے لیے جاری کوششوں کو نمایاں تقویت ملے گی۔

کاپی رائٹ: بزنس ریکارڈر، 2025