ایئر انڈیا کی پرواز میں بم کی اطلاع، تھائی لینڈ میں ہنگامی لینڈنگ

تھائی لینڈ کے شہر فوکٹ سے بھارت کے دارالحکومت نئی دہلی جانے والی ایئر انڈیا کی ایک پرواز کو جمعے کے روز دورانِ پرواز بم کی اطلاع موصول ہوئی، جس کے بعد طیارے نے ہنگامی لینڈنگ کی۔

ایئرپورٹ حکام کے مطابق فلائٹ اے آئی 379 میں سوار تمام 156 مسافروں کو ہنگامی منصوبے کے تحت بحفاظت طیارے سے باہر نکال لیا گیا۔

یہ طیارہ صبح 9:30 بجے فوکٹ ایئرپورٹ سے دہلی کے لیے روانہ ہوا تھا، تاہم پرواز نے انڈمان سمندر کے اوپر ایک طویل چکر لگانے کے بعد واپس فوکٹ میں ہنگامی لینڈنگ کی، جیسا کہ فلائٹ ٹریکر فلائٹ ریڈار 24 نے ظاہر کیا۔

یہ واقعہ اس حادثے کے اگلے ہی روز پیش آیا ہے جس میں ایئر انڈیا کی ایک پرواز احمد آباد سے روانہ ہونے کے کچھ دیر بعد گر کر تباہ ہو گئی تھی، اور جس میں 240 سے زائد افراد ہلاک ہوئے تھے۔

تھائی ایئرپورٹس اتھارٹی (اے او ٹی) نے بم کی اطلاع کی مزید تفصیلات فراہم نہیں کیں۔

ایئر انڈیا کی جانب سے فوری طور پر کوئی تبصرہ نہیں کیا گیا۔

بھارتی ایئرلائنز اور ایئرپورٹس گزشتہ برس فرضی بم دھمکیوں کی زد میں رہے، اور صرف ابتدائی 10 ماہ میں تقریباً 1,000 جھوٹی کالز اور پیغامات موصول ہوئے، جو 2023 کے مقابلے میں تقریباً 10 گنا زیادہ تھے۔