کمپیٹیشن کمیشن نے گمراہ کن اشتہار پر کنگ ڈم ویلی لمیٹڈ پر 15 کروڑ روپے جرمانہ کردیا

غلط اور گمراہ کن مارکیٹنگ کے خلاف کارروائی کرتے ہوئے، کمپیٹیشن کمیشن آف پاکستان (سی سی پی) نے کنگ ڈم ویلی (پرائیویٹ) لمیٹڈ پر 15 کروڑ روپے کا جرمانہ عائد کیا ہے۔ یہ اقدام کمپنی کی جانب سے اپنے ہاؤسنگ منصوبے کے بارے میں گمراہ کن اشتہارات شائع کرنے پر اٹھایا گیا ہے۔

سی سی پی کے جاری کردہ بیان کے مطابق، فئیر ٹریڈ آفس نے از خود نوٹس پر تحقیقات کا آغاز کیا جس میں معلوم ہوا کہ کنگ ڈم ویلی (پرائیویٹ) لمیٹڈ نے اپنے منصوبے کو کنگ ڈم ویلی اسلام آباد کے طور پر اشتہار دیا، حالانکہ یہ منصوبہ موضع چُورہ، تحصیل و ضلع راولپنڈی میں واقع ہے۔

مزید تحقیقات میں یہ بھی پایا گیا کہ کمپنی نے نیا پاکستان ہاؤسنگ پروگرام (این پی ایچ پی) اور نیا پاکستان ہاؤسنگ اینڈ ڈویلپمنٹ اتھارٹی سے منسوب جھوٹے دعوے کیے، اور منصوبے کو ”این او سی اپرووڈ“ ظاہر کیا جبکہ اس کی منظوری کی حیثیت واضح یا مکمل طور پر بیان نہیں کی گئی۔

سی سی پی کے دو رکنی بنچ—جن میں سعید احمد نواز اور عبدالرشید شیخ شامل تھے—نے فیصلہ سناتے ہوئے قرار دیا کہ کمپنی نے مقابلے کے قانون 2010 کی شق 10(2)(a) اور 10(2)(b) کی خلاف ورزی کی، جو صارفین کو جھوٹی یا گمراہ کن معلومات دینے سے منع کرتی ہیں۔ ہر خلاف ورزی پر 7 کروڑ 50 لاکھ روپے کا جرمانہ عائد کیا گیا، جو مجموعی طور پر 15 کروڑ روپے بنتا ہے۔

کمیشن نے یہ بھی نشاندہی کی کہ کمپنی نے آڈٹ شدہ مالیاتی گوشوارے جمع نہیں کرائے اور کمیشن کی ہدایات پر عملدرآمد نہیں کیا۔ مزید یہ کہ کمپنی نے کئی سالوں سے سیکیورٹیز اینڈ ایکسچینج کمیشن آف پاکستان میں اپنے مالیاتی ریکارڈ بھی جمع نہیں کرائے، جو شفافیت اور انتظامی کمزوریوں کو ظاہر کرتا ہے۔

سی سی پی نے اس عزم کا اعادہ کیا کہ وہ صارفین کو دھوکہ دہی پر مبنی مارکیٹنگ سے بچانے اور ہاؤسنگ و رئیل اسٹیٹ سیکٹر میں منصفانہ مسابقت کو یقینی بنانے کے لیے پرعزم ہے۔