یومِ تکبیر آج قومی جوش و جذبے کے ساتھ منایا جارہا ہے

ملک بھر میں آج 28 مئی کو یومِ تکبیر قومی جوش و جذبے سے منایا جا رہا ہے، جس کا مقصد 1998 میں پاکستان کے ایٹمی تجربات کو خراج تحسین پیش کرنا ہے۔ اس موقع پر حکومت نے عام تعطیل کا اعلان کیا ہے اور مختلف شہروں میں تقریبات، ریلیوں، اور سیمینارز کا انعقاد کیا جا رہا ہے۔

یومِ تکبیر ہمیں اُس تاریخی لمحے کی یاد دلاتا ہے جب پاکستان نے بلوچستان کے ضلع چاغی کے راس کوہ پہاڑوں میں ایٹمی تجربات کر کے نہ صرف اپنی دفاعی خودمختاری کا عملی مظاہرہ کیا بلکہ جنوبی ایشیا میں اسٹریٹیجک توازن بھی قائم کیا۔ ڈاکٹر عبدالقدیر خان اور ڈاکٹر ثمر مبارک مند کی قیادت میں سائنسدانوں کی ٹیم نے یہ کارنامہ سرانجام دیا۔

صوبائی وزیر برائے اقلیتی امور رمیش سنگھ اروڑہ اور صوبائی وزیر برائے کھیل ملک فیصل ایوب کھوکھر نے مختلف تقریبات میں شرکت کی اور اس دن کو قومی وقار، خودمختاری اور اتحاد کی علامت قرار دیا۔ انہوں نے سابق وزیر اعظم میاں نواز شریف کی قیادت کو خراج تحسین پیش کیا جنہوں نے عالمی دباؤ کے باوجود جرات مندانہ فیصلہ کرتے ہوئے ایٹمی تجربات کی منظوری دی۔

یومِ تکبیر کے موقع پر طلبا و طالبات نے ملی نغمے اور تقاریر کے ذریعے حب الوطنی کا جذبہ اجاگر کیا۔ مقررین نے نوجوان نسل کو دفاع وطن کے لیے پرعزم رہنے اور ایٹمی طاقت کے حصول کی قربانیوں کو یاد رکھنے کی تلقین کی۔

کاپی رائٹ بزنس ریکارڈر، 2025