افغان اشرافیہ بھارتی فنڈز کیلئے دہشت گردوں کو پناہ دے رہی ہے، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے اتوار کو افغان عوام کو بھائی قرار دیتے ہوئے الزام لگایا کہ افغان اشرافیہ بھارتی حکومت سے ملنے والے پیسوں کے عوض دہشت گردوں کو پناہ دے رہے ہیں۔

خیبر پختونخوا کے مختلف یونیورسٹیوں کے 2,500 سے زائد طلبہ سے خصوصی ملاقات میں، انہوں نے افغانستان سے درخواست کی کہ وہ بھارت کے ہاتھوں میں کھیلنے سے باز رہے۔

ڈی جی آئی ایس پی آر نے کہا کہ کشمیروں کی آزادی کا وقت آ گیا ہے۔

انہوں نے مزید کہا کہ بھارت یہ سمجھتا تھا کہ پاکستان اپنے دفاع میں کمزور ہے کیونکہ وہاں عوام اور مسلح افواج کے درمیان فاصلے ہیں، لیکن قوم نے مسلح افواج کے ساتھ کھڑے ہو کر دشمن کی یہ غلط فہمی دور کر دی۔ یہ بھارت کی اسٹریٹجک غلطی تھی۔

انہوں نے واضح کیا کہ اگر بھارت نے دوبارہ حملہ کیا تو پاکستان کا ردعمل کہیں زیادہ سخت ہوگا۔

انہوں نے کہا کہ ہم نے بھارت کے 26 مقامات پر حملہ کرنے کا فیصلہ کیا تھا، اور پاکستان ایئر فورس نے ان ائربیسز کو تباہ کر دیا جن سے بھارتی جنگی طیارے پاکستانی شہریوں پر حملے کے لیے اُڑے تھے۔

انہوں نے کہا کہ اسی طرح ہم نے بریگیڈ ہیڈکوارٹرز کو بھی تباہ کیا جن کے احکامات پر مظفرآباد پر گولہ باری ہوئی جس میں سات سالہ شہید ارتضٰی کی شہادت ہوئی۔

طلبہ نے قومی پرچم اٹھا رکھے تھے اور ”پاکستان ہمیشہ زندہ باد“ اور ”کشمیر بنے گا پاکستان“ کے نعرے لگائے۔

اس موقع پر پشتون طلبہ نے دشمنانِ وطن کو کبھی معاف نہ کرنے اور انہیں عبرتناک شکست دینے کا عہد کیا۔