پاکستان بھارت کشیدگی، چین کا جامع اور مستقل جنگ بندی پر زور

چین کی وزارت خارجہ کی ترجمان ماؤ نِنگ نے پیر کے روز کہا کہ نائب وزیرِاعظم و وزیرِ خارجہ محمد اسحاق ڈار کا دورۂ چین پاکستان کی حکومت کی چین کے ساتھ تعلقات کو اہمیت دینے کی عکاسی کرتا ہے۔

انہوں نے اپنی معمول کی پریس بریفنگ کے دوران اسحاق ڈار کے تین روزہ سرکاری دورۂ چین پر تبصرہ کرتے ہوئے کہا کہ چین اور پاکستان ہر موسم کے اسٹریٹجک شراکت دار ہیں۔ دونوں ممالک کے درمیان قریبی اور اعلیٰ سطح پر تبادلے اور تعاون کا سلسلہ جاری ہے۔

ترجمان نے کہا کہ چین پاکستان کے ساتھ مل کر دونوں ممالک کے رہنماؤں کے درمیان طے پانے والے اہم نکات پر عملدرآمد، اسٹریٹجک روابط کو مضبوط کرنے، اور تبادلوں و تعاون کو گہرا کرنے کے لیے تیار ہے تاکہ باہمی تعلقات کو مزید آگے بڑھایا جا سکے اور نئے دور میں مشترکہ مستقبل کی حامل قریبی چین-پاکستان کمیونٹی کی تشکیل کو تیز کیا جا سکے۔

بھارت اور پاکستان کی صورتحال سے متعلق ایک سوال پر ماؤ نِنگ نے کہا کہ چین کئی بار اپنا مؤقف واضح کر چکا ہے۔ انہوں نے مزید کہا کہ ہم دونوں ممالک کے ساتھ رابطے میں رہیں گے اور جامع، پائیدار جنگ بندی اور علاقائی امن و استحکام کے قیام کے لیے تعمیری کردار ادا کرتے رہیں گے۔

ایک سوال کے جواب میں ماؤ نِنگ نے کہا کہ میں یہ کہنا چاہتی ہوں کہ بھارت اور پاکستان دونوں چین کے اہم ہمسائے ہیں۔ چین بھارت اور پاکستان کے ساتھ تعلقات کو ہمیشہ سے بہت اہمیت دیتا ہے۔

چینی ترجمان نے کہا کہ ان کا ملک ہمسایہ ممالک کے ساتھ حسنِ سلوک اور خوشگوار تعلقات کے اصول و فلسفے پر کاربند ہے۔