صدر ڈونلڈ ٹرمپ نے جمعرات کے روز اعلان کیا کہ امریکہ اور متحدہ عرب امارات کے درمیان 200 ارب ڈالر سے زائد مالیت کے معاہدے طے پا گئے ہیں، جن میں بوئنگ، جی ای ایرو اسپیس اور الاتحاد ایئر ویز کے درمیان 14.5 ارب ڈالر کا معاہدہ بھی شامل ہے۔ یہ بات وائٹ ہاؤس کی جانب سے بتائی گئی ہے۔
وائٹ ہاؤس کے مطابق، بوئنگ اور جی ای کو الاتحاد ایئر ویز کی جانب سے 14.5 ارب ڈالر کی سرمایہ کاری کی یقین دہانی کرائی گئی ہے، جس کے تحت وہ 28 امریکی ساختہ بوئنگ 787 اور 777X طیارے خریدے گی، جن میں جی ای کے انجن نصب ہوں گے۔
الاتحاد نے فوری طور پر تبصرے کی درخواست کا جواب نہیں دیا۔ جی ای اور بوئنگ کی جانب سے بھی کوئی بیان جاری نہیں کیا گیا۔
وائٹ ہاؤس نے کہا کہ 777X جیسے اگلی نسل کے طیارے کو اپنے بیڑے میں شامل کرنے کے فیصلے سے یہ سرمایہ کاری امریکہ اور متحدہ عرب امارات کے درمیان طویل المدتی تجارتی ہوا بازی کے تعلقات کو مزید گہرا کرتی ہے، جو امریکی مینوفیکچرنگ کو فروغ دیتی ہے اور برآمدات میں اضافہ کرتی ہے۔
الاتحاد کے بیڑے میں تقریباً 100 طیارے شامل ہیں۔
الاتحاد کے سی ای او اینٹونوالڈو نیوس نے گزشتہ ماہ کہا تھا کہ ان کی کمپنی رواں سال 20 سے 22 نئے طیارے شامل کرنے کا ارادہ رکھتی ہے، تاکہ 2030 تک اپنے بیڑے کو 170 سے زائد طیاروں تک توسیع دی جا سکے اور ابوظہبی کی اقتصادی تنوع کی حکمت عملی کو تقویت دی جا سکے۔
الاتحاد، جو کہ ابوظہبی کے 225 ارب ڈالر مالیت کے خودمختار دولت فنڈ ADQ کی ملکیت ہے، کئی سالہ تنظیم نو اور انتظامی تبدیلیوں سے گزری ہے، لیکن نیویس کی قیادت میں اس نے وسعت اختیار کی ہے۔
انہوں نے بتایا کہ رواں سال شامل کیے جانے والے 10 طیارے ایئربس A321LR ہوں گے، جنہیں کمپنی نے پیر کے روز متعارف کرایا اور وہ اگست سے پرواز شروع کریں گے۔ باقی طیاروں میں 6 ایئربس A350 اور 4 بوئنگ 787 شامل ہیں۔
بدھ کے روز، صدر ٹرمپ کے خلیجی عرب ملک کے دورے کے دوران، ریاستی ایئرلائن قطر ایئر ویز نے بوئنگ کے ساتھ بڑے پیمانے پر وائیڈ باڈی طیاروں کی خریداری کا معاہدہ کیا، جس میں 160 طیاروں کی تصدیق شدہ خریداری اور مزید 50 طیارے خریدنے کے اختیارات شامل ہیں۔ وائٹ ہاؤس کے مطابق اس معاہدے کی کل مالیت 96 ارب ڈالر ہے۔
Comments
Comments are closed.