ایزی پیسہ ڈیجیٹل بینک کو قبل از ٹیکس 840 ملین روپے منافع

ایزی پیسہ ڈیجیٹل بینک نے 840 ملین روپے کا قبل از ٹیکس منافع حاصل کیا جب کہ پچھلی سال کی اسی مدت میں یہ منافع 1,028 ملین روپے تھا۔

ایزی پیسہ ڈیجیٹل بینک کے بورڈ آف ڈائریکٹرز نے 23 اپریل 2025 کو منعقدہ اپنے اجلاس کے دوران 31 مارچ 2025 کو ختم ہونے والی سہ ماہی کے مالیاتی گوشواروں کی منظوری دی۔

اگرچہ اسٹیٹ بینک کے ڈسکاؤنٹ ریٹ 22 فیصد سے کم ہو کر 12 فیصد پر آگئے تاہم مجموعی آمدنی میں 36.2 فیصد اضافہ ریکارڈ کیا گیا جس کی بنیادی وجہ ڈپازٹ اور قرضہ جات کے شعبوں میں مضبوط نمو ہے۔ نیٹ مارک اپ آمدنی میں 24.2 فیصد اضافہ ہوا جبکہ نان مارک اپ آمدنی میں 55.6 فیصد کا نمایاں اضافہ دیکھا گیا جو کیش ٹرانزیکشنز، آن لائن ادائیگیوں، بنڈلز، کارپوریٹ ادائیگیوں، کلکشنز اور انشورنس سروسز سے حاصل ہونے والی ڈیجیٹل آمدنی میں اضافے کے باعث ممکن ہوا۔

انتظامی اخراجات میں اضافہ بینک کی طویل مدتی ترقی اور پائیداری کو سہارا دینے کے لیے ٹیکنالوجی کے بنیادی ڈھانچے، ٹیلنٹ کے حصول اور نظام میں بہتری کے لیے جاری سرمایہ کاری کی عکاسی کرتا ہے۔

31 مارچ 2025 تک ایزی پیسہ ڈیجیٹل بینک کے صارفین کے ڈپازٹس101 ارب روپے تک پہنچ گئے جو کہ 59.7 فیصد اضافہ ظاہر کرتے ہیں۔ یہ اضافہ نئی سیونگز مصنوعات، جیسے ڈیجیٹل ٹرم ڈپازٹس اور سیونگز پاکٹس، کے کامیاب اجراء کے باعث ممکن ہوا۔ بینک نے 98.7 فیصد کی صنعت میں سب سے بلند کاسا تناسب برقرار رکھا جبکہ ڈپازٹس کی لاگت محض 1.4 فیصد رہی۔

بینک کی ایکویٹی بیس 71.7 فیصد اضافے کے ساتھ 14.9 ارب روپے تک پہنچ گئی، جس کی بنیاد برقرار رکھی گئی آمدنی اور 2024 کی چوتھی سہ ماہی میں بینک کے اسپانسرز کی جانب سے 1 کروڑ امریکی ڈالر کی سرمایہ کاری پر ہے۔

بینک کی مضبوط سرمایہ پوزیشن، مسلسل منافع بخش کارکردگی اور مؤثر رسک مینجمنٹ فریم ورک کو تسلیم کرتے ہوئے پاکرا نے بینک کی کریڈٹ ریٹنگ کو اے سے بڑھا کر اے پلس کر دیا ہے جو بینک کی مالی طاقت اور عملی لچک کو ظاہر کرتا ہے۔

کاپی رائٹ بزنس ریکارڈر، 2025