وزیراعظم نے 20 ارب روپے مالیت کے رمضان ریلیف پیکج کا افتتاح کردیا

وزیراعظم شہباز شریف نے ہفتہ کو رمضان ریلیف پیکج کا آغاز کردیا جس کی مالیت 20 ارب روپے ہے، پیکج کے تحت ملک بھر کے 40 لاکھ مستحق خاندانوں کو شفاف اور آسان انداز میں ڈیجیٹل والٹ کے ذریعے 5ہزار روپے فی خاندان دیے جائیں گے۔

اسلام آباد میں افتتاحی تقریب سے خطاب کرتے ہوئے وزیراعظم نے کہا کہ یہ ریلیف پیکج چاروں صوبوں، آزاد کشمیر اور گلگت بلتستان کو شامل کرے گا۔

وزیراعظم نے کہا کہ رواں سال اس مقصد کے لیے 20 ارب روپے مختص کیے گئے ہیں جو گزشتہ سال 7 ارب کے پیکج کے مقابلے میں 3 گنا زیادہ ہے۔

وزیراعظم نے اس بات پر زور دیا کہ پیکج سے عوام کو یوٹیلٹی اسٹورز کے باہر لمبی قطاروں میں کھڑے ہونے کی پریشانی سے نجات ملے گی،ریلیف پیکج کی نگرانی اور مانیٹرنگ 24 گھنٹے کی جائے گی۔

وزیراعظم نے تمام متعلقہ اداروں اور وزارتوں بشمول اسٹیٹ بینک آف پاکستان، نادرا، بی آئی ایس پی اور ٹیک کمپنیوں کی بھی تعریف کی جنہوں نے دن رات محنت کر کے ایک ڈیجیٹل میکانزم تیار کیا۔

انہوں نے مزید کہا کہ وفاقی حکومت کے اس اقدام سے ملک کے تمام حصوں کو اچھی طرح سے تیار کردہ ڈیجیٹل نظام کے ذریعے فائدہ پہنچے گا۔

اس موقع پر وزیر صنعت و پیداوار رانا تنویر حسین نے کہا کہ پیکج کے تحت نقد رقم کی منتقلی 10 روز میں مکمل کرلی جائے گی۔

رمضان المبارک کے دوران 135 روپے فی کلو چینی کی فراہمی کے لئے تحصیل سطح پر اسٹالز لگائے جائیں گے۔

انہوں نے کہا کہ یوٹیلٹی اسٹورز بھی عوام کو 15 فیصد رعایت پر اشیائے ضروریہ فراہم کریں گے۔

اس سے قبل وفاقی وزیر صنعت و پیداوار رانا تنویر نے اس بات کی تردید کی تھی کہ حکومت یوٹیلٹی اسٹورز کارپوریشن (یو ایس سی) کو بند کرنے جا رہی ہے، جس کے ذریعے پہلے رمضان پیکج دیے جاتے تھے، انہوں نے مزید کہا کہ یو ایس سی کی تنظیم نو اور نجکاری آگے بڑھنے کا راستہ ہے۔