وزیر خزانہ کی برطانوی سفارتکار سے ملاقات، سرمایہ کاری کے مواقع پر تبادلہ خیال

وفاقی وزیر خزانہ و محصولات سینیٹر محمد اورنگزیب نے پرتگال کے شہر لزبن میں برطانوی پارلیمانی انڈر سیکریٹری آف اسٹیٹ برائے مشرق وسطیٰ، افغانستان اور پاکستان ہمیش فالکنر سے ملاقات کی اور باہمی دلچسپی کے امور پر تبادلہ خیال کیا۔

وزارت خزانہ کی جانب سے جاری پریس ریلیز کے مطابق محمد اورنگزیب نے کہا کہ پاکستان اور برطانیہ کے درمیان قریبی اور خوشگوار تعلقات ہیں جو باہمی اعتماد اور روابط پر مبنی ہیں۔

انہوں نے دونوں ممالک کے درمیان مزید مضبوط تعلقات کے لئے کام کرنے کی خواہش کا اظہار کیا۔

ملاقات میں پاکستان میں توانائی، معدنیات اور انفراسٹرکچر کے شعبوں میں سرمایہ کاری کے مواقع سمیت دلچسپی کے دیگر امور پر تبادلہ خیال کیا گیا۔

دوطرفہ تعلقات کو فروغ دینے میں پاکستانی تارکین وطن کے ذریعے عوامی رابطوں کے کردار کو بھی سراہا گیا۔