بجٹ میں 9 ارب ڈالر کا ٹائم ڈپازٹ، رواں سال جولائی تا اکتوبر کوئی رقم نہیں ملی، حکومت

حکومت کو مالی سال 25-2024 کے پہلے چار ماہ (جولائی تا اکتوبر) کے دوران بجٹ میں مختص 9 ارب ڈالر کے ٹائم ڈپازٹس میں سے کوئی رقم موصول نہیں ہوئی جبکہ گزشتہ مالی سال کے اسی عرصے کے دوران 3 ارب ڈالر کی رقم حاصل کی گئی تھی۔

اقتصادی امور ڈویژن (ای اے ڈی) کے اعداد و شمار سے ظاہر ہوتا ہے کہ حکومت نے رواں مالی سال کے لیے 9 ارب ڈالر کے ٹائم ڈپازٹس کا بجٹ مختص کیا ہے جس میں 5 ارب ڈالر سعودی عرب ٹائم ڈپازٹ اور 4 ارب ڈالر سیف چائنا ڈپازٹ شامل ہیں تاہم اس مد میں پہلے چار ماہ (جولائی تا اکتوبر) کے دوران کوئی رقم موصول نہیں ہوئی۔

ذرائع کا کہنا ہے کہ حکومت نے گزشتہ مالی سال 24-2023 کے لیے 3 ارب ڈالر کا ٹائم ڈپازٹ مختص کیا تھا جس میں سعودی عرب سے 2 ارب ڈالر اور متحدہ عرب امارات سے ایک ارب ڈالر شامل تھے۔ سعودی عرب اور متحدہ عرب امارات کی جانب سے 3 ارب ڈالر کی ٹائم ڈپازٹ گزشتہ مالی سال کے پہلے مہینے میں حاصل کی گئی تھی تاہم رواں مالی سال کے پہلے چار ماہ کے دوران اس مد میں کوئی رقم ادا نہیں کی گئی۔

اعداد و شمار کے مطابق حکومت نے مالی سال 25-2024 کے لیے غیر ملکی کمرشل بینکوں سے 3.779 ارب ڈالر کا بجٹ مختص کیا تھا۔ اس مد میں ملک کو 200 ملین ڈالر ملے اور وہ ستمبر میں ملے تھے۔ ای اے ڈی کے اعداد و شمار کے مطابق ملک نے جولائی، اگست اور اکتوبر میں کمرشل بینکوں سے قرض نہیں لیا۔

حکومت نے مالی سال 25-2024 کے لئے مختلف فنانسنگ ذرائع سے 19.393 بلین ڈالر کا بجٹ رکھا ہے جس میں 19.216 بلین ڈالر کے قرضے اور 176.29 ملین ڈالر کی گرانٹ شامل ہے۔ تاہم اس میں بین الاقوامی مالیاتی فنڈ (آئی ایم ایف) کی کوئی رقم شامل نہیں ہے۔

آئی ایم ایف کی رپورٹ ”2024 آرٹیکل 4 مشاورت اور توسیعی فنڈ سہولت کے تحت توسیعی انتظامات کی درخواست“ میں کہا گیا ہے کہ پاکستانی حکام نے کہا ہے کہ انہوں نے اپنے معاشی اصلاحاتی پروگرام کی حمایت کرنے اور بیرونی بفرز میں خاطر خواہ اضافہ کرنے کے لئے بین الاقوامی شراکت داروں سے مناسب مالی اعانت حاصل کی ہے۔

موجودہ تخمینوں سے پتہ چلتا ہے کہ پہلے سے موجود مالیاتی وعدوں، رول اوورز اور آئی ایم ایف پروگرام کو شامل کرنے کے بعد، پروگرام کی مدت کے دوران بقیہ مالی ضروریات 5 ارب ڈالر تک پہنچ جائیں گی۔

انہوں نے کہا کہ معاہدے کے پہلے 12 ماہ کے دوران اس کمی کو ختم کرنے کے لیے ہم نے چین، سعودی عرب، ایشیائی ترقیاتی بینک اور اسلامی ترقیاتی بینک سمیت دو طرفہ اور کثیر الجہتی شراکت داروں سے مالی وعدوں کو حاصل کیا ہے۔

حکام نے مزید کہا کہ دوطرفہ شراکت داروں کی جانب سے پروگرام کی مدت کے دوران قلیل مدتی دعووں (بشمول قرضوں، تبادلوں اور ڈپازٹس) کو جاری رکھنے کے مزید تجدید شدہ وعدے موصول ہوئے ہیں، اور ان دعووں کی مدت میں توسیع کی کوشش کی جائے گی، جس سے اعلی مجموعی مالی ضروریات کا بوجھ اور خطرات کم ہوں گے۔

کاپی رائٹ بزنس ریکارڈر، 2024