ترجیحی شعبوں کیلئے فنانسنگ حکومت کی ترجیح، وزیر خزانہ کی اسٹیٹ بینک اور پی بی اے کے سربراہان سے گفتگو

وفاقی وزیر خزانہ و ریونیو سینیٹر محمد اورنگزیب نے گورنر اسٹیٹ بینک اور چیئرمین پاکستان بینکس ایسوسی ایشن (پی بی اے) اور ان کی ٹیموں سے ورچوئل میٹنگ کی جس میں ترجیحی شعبوں کیلئے فنانسنگ پر پیش رفت پر تبادلہ خیال کیا گیا۔

چیئرمین پی بی اے ظفر مسعود نے وفاقی وزیر کو ایک جامع اور پائیدار مالیاتی نظام کی تعمیر کے لئے پی بی اے کی جانب سے منصوبہ بندی کردہ مختلف اقدامات سے آگاہ کیا۔

انہوں نے تجویز پیش کی کہ الیکٹرانک ویئر ہاؤس رسیپٹ فنانس، ایس ایم ای انڈیکس، کارپوریٹ فارمنگ فنانسنگ، فن ٹیک کے لئے وینچر کیپٹل فنڈ، ایگری کوآپریٹوز کی بحالی اور مالیاتی ڈیٹا ایکسچینج کا قیام پائیدار مالیاتی ماحولیاتی نظام کی طرف طویل مدتی اثرات پیدا کرنے کے لئے کچھ ممکنہ اقدامات ہوسکتے ہیں۔

انہوں نے فین فنانسنگ، ای وی فنانسنگ، ٹیوب ویلز کی سولرائزیشن اور مارک اپ سبسڈی اور ایس ایم ای فنانسنگ کے لیے فرسٹ لاس کوریج جیسے اقدامات کی بھی تجویز پیش کی تاکہ سسٹم پر قلیل مدتی اور زیادہ اثرات مرتب ہوں۔

گورنر اسٹیٹ بینک جمیل احمد نے ترجیحی شعبوں میں فنانسنگ کے لئے پی بی اے کی جانب سے تجویز کردہ مختلف اقدامات کے سلسلے میں مختلف محاذوں پر ہونے والی پیش رفت پر روشنی ڈالی۔

انہوں نے دلیل دی کہ پی بی اے کی تجویز کردہ کچھ تجاویز دائرہ کار کے لحاظ سے ٹھوس ہیں اور مرکزی بینک پہلے ہی ان پر عمل درآمد کو آسان بنانے کے لئے ریگولیٹری سائیڈ پر ضروری نوٹیفکیشن جاری کر چکا ہے۔

انہوں نے پائیدار فنانسنگ کے لئے زراعت اور ایس ایم ای شعبوں کے لئے اعداد و شمار جمع کرنے اور اسکور کارڈ بنانے کے اقدامات پر اسٹیک ہولڈرز خاص طور پر ٹیلی کوز اور پاور کمپنیوں کے ساتھ زیادہ فعال مشاورت کی تجویز بھی پیش کی۔

اس موقع پر گفتگو کرتے ہوئے وزیر خزانہ و محصولات سینیٹر محمد اورنگزیب نے پی بی اے اور اسٹیٹ بینک کی جانب سے ٹھوس اقدامات پر عمل درآمد کو سراہا۔

انہوں نے زور دیا کہ قلیل مدتی اور فوری اثرات والے اقدامات کو ترجیح دی جائے اور دسمبر کے آخر تک انہیں حتمی شکل دینے کے لئے ان پر عمل درآمد کا ٹائم فریم کم کیا جائے اور امید ہے کہ انہیں اگلے سال کے اوائل سے نافذ کیا جائے گا۔

وفاقی وزیر نے پی بی اے/ اسٹیٹ بینک اور اسٹیک ہولڈرز کی وزارتوں کے درمیان ضروری مشاورت کے انتظامات کے لئے مکمل تعاون کی یقین دہانی کرائی، انہوں نے مزید کہا کہ فنانس ڈویژن تمام متعلقہ اسٹیک ہولڈرز کے نقطہ نظر کو سننے اور مجوزہ اقدامات پر اتفاق رائے پیدا کرنے میں مدد کے لئے ایک اجلاس کی میزبانی بھی کرے گا۔