پاکستان اور چین کے درمیان سولر ای بائیکس متعارف کرانے کا ابتدائی معاہدہ طے پا گیا

پاکستانی اور چینی کمپنیاں پاکستان میں ماحول دوست سولر ای بائیکس متعارف کرانے کے لیے ابتدائی تعاون کے معاہدے پر پہنچ گئی ہیں۔

ایک نجی نیوز چینل کی رپورٹ کے مطابق اس مشترکہ منصوبے میں پاکستان کے معروف الیکٹرک اسکوٹر برانڈ روڈ کنگ اور چین میں قائم اسٹارٹ اپ اے جی اے او سولر موبلٹی شامل ہیں جو شمسی توانائی سے چلنے والے اسکوٹرز میں مہارت رکھتے ہیں۔

چائنا اکنامک نیٹ (سی ای این) کی رپورٹ کے مطابق دونوں فریقین نے پاکستان میں مقامی نقل و حمل کی مارکیٹ کی طلب، مصنوعات کی ترقی کے رجحانات، اور تعاون کے مخصوص طریقوں کے بارے میں تفصیلی بات چیت کی۔

چینی کمپنی کا کہنا تھا کہ یہ جدید طریقہ کار مختصر فاصلے کے سفر کے لیے صفر کاربن اخراج حل فراہم کرنے کے لیے وقف ہے۔

کمپنی نے کہا کہ سولر اسکوٹر، سولر پینلز سے لیس، اسکوٹر کی بیٹری کو چارج کرنے کے لیے شمسی توانائی کا استعمال کرتے ہیں جو روایتی چارجنگ طریقوں کی ضرورت کو کم کرتے ہیں۔

چینی کمپنی نے روڈ کنگ کو تکنیکی مدد، پروڈکٹ کو بہتر بنانے اور سولر ای بائیکس کے لیے مارکیٹنگ میں مدد فراہم کرنے پر آمادگی ظاہر کی۔ اس کا مقصد مشترکہ طور پر اعلیٰ معیار کی نقل و حمل کی مصنوعات تیار کرنا ہے جو مقامی مارکیٹ کی ضروریات کو پورا کرتی ہیں۔

روڈ کنگ کے وفد نے کہا کہ ہم چین کے ساتھ فعال طور پر تعاون کو فروغ دیں گے اور پاکستانی مارکیٹ میں شمسی ای بائیکس متعارف کرائیں گے۔

انہوں نے اس بات پر زور دیا کہ شمسی ای بائیکس کی ماحولیاتی دوستی اور اعلی کارکردگی پاکستان کی گرین ٹرانسپورٹیشن سلوشنز کی موجودہ طلب سے مکمل طور پر مطابقت رکھتی ہے۔