ایشین ڈیولپمنٹ بینک نے پاکستان کے پنشن اصلاحاتی پروگرام کے لیے 50 کروڑ ڈالر قرض کی منظوری دے دی
- یہ مالی معاونت پبلک سیکٹر پنشن پروگرام میں تبدیلی کے تحت فراہم کی جائے گی
ایشین ڈویلپمنٹ بینک (اے ڈی بی) نے پاکستان کے وفاقی سول ملازمین کے پنشن نظام میں اصلاحات کے لیے 50 کروڑ ڈالر کے نتائج سے منسلک قرض کی منظوری دے دی ہے۔ بینک نے جاری بیان میں اس بات کی تصدیق کی۔
یہ مالی معاونت ’’ٹرانسفارمنگ پبلک سیکٹر پنشن پروگرام‘‘ کے تحت فراہم کی جائے گی۔ اس قرض کے ذریعے حکومت کے پنشن اصلاحات پر عمل درآمد کے منصوبے کے پہلے مرحلے کی معاونت کی جائے گی، جس میں متعین شراکت داری کے پنشن نظام کی جانب منتقلی بھی شامل ہے۔ جولائی 2024 سے بھرتی ہونے والے وفاقی سول ملازمین کے لیے اس نئے نظام میں شمولیت لازمی قرار دی گئی ہے۔
مالی سال 2016 کے بعد سے وفاقی پنشن اخراجات میں تقریباً پانچ گنا اضافہ ہو چکا ہے اور اب یہ سالانہ ایک ہزار ارب روپے سے تجاوز کر گئے ہیں۔ موجودہ پرانا پنشن نظام غیر فنڈ شدہ اور غیر شراکتی بنیادوں پر قائم ہے، جس کے تمام اخراجات سالانہ بجٹ سے پورے کیے جاتے ہیں۔ پنشن کی ذمہ داریوں میں اضافے کے باعث سرکاری مالی وسائل پر دباؤ مسلسل بڑھ رہا ہے۔
ان اصلاحات کا مقصد پنشن اخراجات میں اضافے کو محدود کرنا، نظام کو زیادہ پائیدار بنانا اور ترقیاتی منصوبوں اور سماجی شعبے پر اخراجات کے لیے مالی گنجائش پیدا کرنا ہے۔
اے ڈی بی کے مطابق اس کی مالی معاونت سے پنشن کی مالی ذمہ داریوں میں کمی لانے، ڈیجیٹل نظام کے ذریعے مالیاتی شفافیت بہتر بنانے اور پنشن سے مستفید ہونے والے افراد کو فراہم کی جانے والی خدمات اور مالیاتی آگاہی میں بہتری لانے میں بھی مدد ملے گی۔
پاکستان میں اے ڈی بی کی کنٹری ڈائریکٹر ایما فین نے کہا کہ پاکستان نے اپنے وفاقی پنشن نظام کو مضبوط بنانے کے لیے اہم اقدامات کیے ہیں۔
انہوں نے مزید کہا کہ بینک کی معاونت سے اداروں کو مضبوط بنانے، شفافیت بڑھانے اور پنشن کے زیادہ پائیدار نظام کے قیام کے ذریعے طویل مدتی نتائج حاصل کرنے میں مدد ملے گی۔