صنعتیں محض بجلی کے قومی گرڈ سے کنارہ کشی کیوں نہیں کر سکتیں؟

توانائی سے متعلق ایک تقریب میں حال ہی میں اظہارِ خیال کی دعوت ملی تو وہاں ہونے والی تقاریر کے بجائے شرکاء کے سوالات زیادہ توجہ کا مرکز بنے۔ صنعت کار بار بار ایک ہی سوال کر رہے تھے کہ کیا وہ اپنی فیکٹریوں کو مکمل طور پر قومی بجلی کے گرڈ سے الگ کر سکتے ہیں اور اپنی اراضی پر شمسی توانائی کے نظام اور فیکٹری کے احاطے میں بیٹریاں نصب کرکے بجلی کی تمام ضروریات خود پوری کر سکتے ہیں؟

پاکستان نے 2025ء میں 4.6 گیگا واٹ آور لیتھیم آئن بیٹریاں درآمد کیں، جو اس سے ایک سال پہلے کے مقابلے میں تین گنا سے بھی زیادہ تھیں، جبکہ صنعت پہلے ہی تقریباً 2 گیگا واٹ آور بیٹریاں استعمال کر رہی ہے (رینیوایبلز فرسٹ، 2026ء)۔ تاہم دنیا کے دیگر ممالک میں فیکٹریاں شمسی توانائی اور بیٹریوں کے نظام تو نصب کر رہی ہیں، لیکن بجلی کے قومی گرڈ سے منسلک رہتی ہیں۔ بہت کم صنعتوں نے مکمل طور پر گرڈ سے رابطہ منقطع کیا ہے۔ کیا پاکستان اس معاملے میں مختلف ہے یا یہاں بھی عملی حساب کتاب یہی حقیقت سامنے لاتا ہے؟ میں نے اس سوال کا جواب اعداد و شمار کی مدد سے تلاش کرنے کا فیصلہ کیا۔

یہ خیال بظاہر پُرکشش ہے، لیکن جب اس کے لیے درکار نظام کا حجم متعین کیا جائے تو مشکلات سامنے آتی ہیں۔ بجلی کے قومی گرڈ سے مکمل علیحدگی کی راہ میں چار بڑی رکاوٹیں حائل ہیں: سردیوں کا موسم، توانائی ذخیرہ کرنے کی ضرورت، زمین کی دستیابی اور لاگت۔ ان رکاوٹوں کا جائزہ لینے کے لیے میں نے وسطی پنجاب میں ایک عام فیکٹری کو بنیاد بنا کر سردیوں کے موسم میں اس کی توانائی کی ضروریات کا تخمینہ لگایا۔

زیرِ جائزہ فیکٹری

اس تجزیے کے لیے وسطی پنجاب میں 20 میگاواٹ کی ایک پروسیسنگ یا انجینئرنگ یونٹ فرض کی گئی ہے، جس کا لوڈ فیکٹر 50 فیصد اور یومیہ بجلی کی کھپت 240 میگاواٹ آور ہے۔

فرض کیا گیا ہے کہ فیکٹری صبح 6 بجے سے رات 10 بجے تک 16 گھنٹے کام کرتی ہے۔ اس دوران اوسط بجلی کی طلب تقریباً 14 میگاواٹ رہتی ہے، جبکہ زیادہ سے زیادہ طلب 20 میگاواٹ تک پہنچ جاتی ہے۔ اس کے بعد 8 گھنٹے کے کم لوڈ والے دورانیے میں صرف روشنی اور دیگر بنیادی سہولیات کے لیے تقریباً 2 میگاواٹ بجلی درکار ہوتی ہے۔ تمام اعداد و شمار اسی کھپت کی بنیاد پر مرتب کیے گئے ہیں۔ زیادہ بجلی استعمال کرنے والے کارخانے کو اسی تناسب سے زیادہ شمسی پینلز، بیٹریوں اور انورٹرز کی ضرورت ہوگی۔

یہ تجزیہ دانستہ طور پر نسبتاً نرم مفروضوں پر مبنی ہے۔ اس میں روزانہ کی بنیاد پر توانائی کی پیداوار اور کھپت کا سادہ توازن رکھا گیا ہے، صرف ایک ایسے دن کو مدنظر رکھا گیا ہے جب دھوپ دستیاب نہ ہو، جبکہ زمین کی قیمت کو بھی شامل نہیں کیا گیا۔ اس لیے حقیقت میں گرڈ سے مکمل طور پر الگ ہونے کے لیے درکار وسائل اس سے کہیں زیادہ ہوں گے۔

پہلی رکاوٹ: سردیوں کا موسم

مسئلہ: گرڈ سے منقطع فیکٹری کے لیے شمسی توانائی کا نظام اوسط یومیہ ضرورت کے بجائے سال کے مشکل ترین مہینے کو مدنظر رکھ کر نصب کرنا پڑتا ہے۔ جب متبادل کے طور پر قومی گرڈ دستیاب نہ ہو تو دسمبر اور جنوری ہی پورے نظام کی مطلوبہ استعداد کا تعین کرتے ہیں۔

ناسا پاور کے اعداد و شمار کے مطابق لاہور میں موسم بہار کے دوران ہر ایک کلوواٹ پیک شمسی استعداد سے یومیہ تقریباً 6.5 کلوواٹ آور بجلی پیدا ہوتی ہے، لیکن سردیوں میں یہ پیداوار کم ہوکر 3.5 کلوواٹ آور رہ جاتی ہے۔ سردیوں کے انتہائی کم دھوپ والے ہفتوں میں یہ شرح مزید گر جاتی ہے، اس لیے حساب کے لیے 3.2 کلوواٹ آور فرض کیا گیا ہے۔

دھند اس صورت حال کو مزید مشکل بنا دیتی ہے۔ محکمہ موسمیات کے ریکارڈ کے مطابق دسمبر اور جنوری میں مشرقی پنجاب کے مختلف علاقوں میں ماہانہ 15 سے 20 دن دھند چھائی رہتی ہے، جو بعض اوقات مسلسل کئی روز تک برقرار رہتی ہے۔ اس دوران مفید دھوپ کا دورانیہ صبح تقریباً 9 بجے سے شام 5 بجے تک محدود رہ جاتا ہے، جبکہ ان اوقات میں فیکٹری اپنی یومیہ توانائی کا صرف 47 فیصد استعمال کرتی ہے۔

سردیوں کے ایک دن کی ضروریات پوری کرنے کے لیے اس فیکٹری کو تقریباً 105 میگاواٹ پیک شمسی پینلز درکار ہوں گے، جو اس کی 20 میگاواٹ کی زیادہ سے زیادہ بجلی طلب سے پانچ گنا سے بھی زیادہ ہیں۔ گرمیوں میں یہی پینلز ضرورت سے کہیں زیادہ بجلی پیدا کریں گے اور سالانہ مجموعی پیداوار کا تقریباً نصف حصہ ضائع ہوگا۔

دوسری رکاوٹ: توانائی ذخیرہ کرنے کی گنجائش

مسئلہ: بیٹریوں کو ہر شام اور رات کے علاوہ دھوپ کے بغیر گزرنے والے ہر دن کے لیے بھی بجلی فراہم کرنا ہوگی۔ اس صورت میں دن کے وقت زیادہ کام کرنے والے کارخانوں کو حاصل ہونے والا فائدہ بڑی حد تک ختم ہوجاتا ہے۔

سورج تقریباً شام 5 بج کر 15 منٹ پر غروب ہوجاتا ہے، لیکن فیکٹری رات 10 بجے تک پوری استعداد کے ساتھ کام کرتی ہے۔ اسی طرح صبح کے ابتدائی اوقات میں بھی شمسی توانائی دستیاب نہیں ہوتی۔ رات کے وقت بنیادی ضروریات کی کھپت کو شامل کیا جائے تو بیٹریوں کو روزانہ تقریباً 130 میگاواٹ آور بجلی فراہم کرنا ہوگی، جو 24 گھنٹے یکساں لوڈ پر چلنے والی فیکٹری کی ضرورت سے صرف پانچواں حصہ کم ہے۔

تاہم اصل مسئلہ دھند ہے۔ ایسے دن جب دھوپ بالکل دستیاب نہ ہو، بیٹریوں کو تنہا 247 میگاواٹ آور کی مکمل ضرورت پوری کرنا ہوگی۔ توانائی کے ضیاع، بیٹریوں کے قابلِ استعمال ذخیرے کی حدود اور 15 سال کے دوران ان کی استعداد میں کمی کو مدنظر رکھا جائے تو مطلوبہ بیٹری گنجائش تقریباً 560 میگاواٹ آور تک پہنچ جاتی ہے۔ یہ پاکستان کی جانب سے 2025ء میں درآمد کی گئی مجموعی بیٹریوں کا تقریباً 12 فیصد ہے۔

اس کے علاوہ انورٹرز کی استعداد بھی تقریباً 42 ایم وی اے ہونی چاہیے، تاکہ وہ پورے کارخانے کو بجلی فراہم کرنے کے ساتھ چند گھنٹوں کی دھوپ میں بیٹریاں بھی دوبارہ چارج کرسکیں۔ یہ استعداد فیکٹری کی زیادہ سے زیادہ بجلی طلب سے تقریباً دوگنا ہے۔

تیسری رکاوٹ: زمین کی دستیابی

مسئلہ: سردیوں کی ضروریات پوری کرنے کے لیے درکار شمسی توانائی کا نظام اتنی زیادہ زمین چاہتا ہے جو عام طور پر کسی فیکٹری کے پاس دستیاب نہیں ہوتی۔ فیکٹری کی چھت پر زیادہ سے زیادہ چند میگاواٹ کے شمسی پینلز نصب کیے جا سکتے ہیں، جبکہ باقی نظام کے لیے زمین درکار ہوگی۔

زمین پر نصب کیے جانے والے شمسی توانائی کے نظام کے لیے فی میگاواٹ پیک تقریباً 2.8 ایکڑ جگہ درکار ہوتی ہے۔ اس حساب سے 105 میگاواٹ پیک کے نظام کے لیے تقریباً 295 ایکڑ زمین درکار ہوگی، جبکہ اس میں بیٹریوں کے احاطے اور گرڈ اسٹیشن کے لیے درکار جگہ شامل نہیں۔

وسطی پنجاب میں کسی صنعتی علاقے کے قریب اتنی بڑی اضافی اراضی ملنا مشکل ہے، جبکہ اس کی قیمت بھی اس تجزیے میں شامل نہیں کی گئی۔

چوتھی رکاوٹ: لاگت

مسئلہ: جب سردیوں اور دھند کے دوران بجلی کی ضروریات پوری کرنے کے لیے نظام کی استعداد بڑھائی جاتی ہے تو اس سے پیدا ہونے والی بجلی قومی گرڈ کے مقابلے میں کہیں زیادہ مہنگی پڑتی ہے۔

اس تخمینے میں پاکستان میں شمسی توانائی کے نظام کی موجودہ قیمت تقریباً 400 ڈالر فی کلوواٹ اور بیٹریوں کی قیمت 240 ڈالر فی کلوواٹ آور فرض کی گئی ہے۔ ان اخراجات کا حساب 15 سال کے عرصے اور سرمائے کی 10 فیصد لاگت کی بنیاد پر لگایا گیا ہے، جبکہ ڈالر کی شرح تبادلہ 280 روپے فرض کی گئی ہے۔ زمین کی قیمت اس میں شامل نہیں۔

اس کے مقابلے میں گرڈ بجلی کے نرخ کا موازنہ کیلنڈر سال 2026ء کے بی-4 ٹیرف کے مکمل بل سے کیا گیا ہے، جس کے تحت فی یونٹ قیمت 26.43 روپے اور ماہانہ زیادہ سے زیادہ طلب کے ہر کلوواٹ پر 1,250 روپے مقرر ہیں۔ ٹیکسوں سے پہلے اس کی اوسط لاگت تقریباً 29.9 روپے فی یونٹ بنتی ہے۔

قابلِ اعتماد آف گرڈ بجلی کی فراہمی کی لاگت قومی گرڈ کے مقابلے میں تقریباً 2.8 گنا زیادہ ہے۔ حتیٰ کہ اس نظام کی انتہائی محدود شکل، جس میں دھند کے پہلے ہی دن فیکٹری کو کام بند کرنا پڑے گا، بھی گرڈ بجلی سے 30 فیصد مہنگی پڑتی ہے۔

انٹرنیشنل رینیوایبل انرجی ایجنسی (آئی رینا) کے 2026ء کے تخمینے کے مطابق شمسی توانائی اور بیٹریوں کے امتزاج سے بجلی کی لاگت 85 ڈالر فی میگاواٹ آور سے کم رکھی جا سکتی ہے، لیکن اس صورت میں بجلی کی فراہمی کا قابلِ اعتماد تناسب صرف 95 فیصد ہوگا۔ باقی 5 فیصد وقت کے لیے بجلی کی مسلسل فراہمی یقینی بنانا ہی خود کفالت کو اتنا مہنگا بنا دیتا ہے۔

ایک فیکٹری کا مالک اس کے بجائے صرف رات کے وقت استعمال کے لیے بیٹریاں نصب کرکے دھند والے دنوں میں ڈیزل جنریٹر بھی استعمال کرسکتا ہے۔ اگر سال میں تقریباً 15 دن جنریٹر چلایا جائے تو 24 میگاواٹ کا جنریٹر سیٹ بجلی کی لاگت تقریباً 47 روپے فی یونٹ تک پہنچا دے گا، جو پھر بھی قومی گرڈ سے 1.6 گنا زیادہ ہے، جبکہ اس کے ساتھ کئی نئے مسائل بھی پیدا ہوں گے۔

اوگرا کی موجودہ مقرر کردہ 399 روپے فی لیٹر قیمت کے مطابق جنریٹر سے پیدا ہونے والی بجلی پر صرف ایندھن کی لاگت ہی تقریباً 108 روپے فی یونٹ بنتی ہے۔ اس کے علاوہ فیکٹری کو تیل کی قیمتوں اور شرح تبادلہ میں اتار چڑھاؤ کے خطرات کا سامنا بھی کرنا پڑے گا۔ جنریٹرز کی دیکھ بھال، پرزوں کی دستیابی اور ایندھن ذخیرہ کرنے کے انتظامات بھی درکار ہوں گے۔ یہ شور بھی پیدا کرتے ہیں اور سالانہ تقریباً 10 لاکھ لیٹر ڈیزل استعمال کرتے ہیں، جس سے لگ بھگ 2,600 ٹن کاربن ڈائی آکسائیڈ خارج ہوتی ہے۔

کیا بڑی فیکٹری یا بہتر مقام سے صورت حال بدل سکتی ہے؟

فیکٹری کا حجم بڑھانے سے بھی کوئی خاص فرق نہیں پڑتا۔ 16 گھنٹے کام کرنے کے اسی طریقہ کار اور دھوپ کے بغیر ایک دن کی ضروریات پوری کرنے کے لیے مختص بیٹری ذخیرے کی بنیاد پر مختلف حجم اور لوڈ فیکٹر رکھنے والی فیکٹریوں کے نتائج تقریباً یکساں رہتے ہیں۔

چونکہ بجلی کی کھپت بڑھنے کے ساتھ آلات کی استعداد بھی اسی تناسب سے بڑھانا پڑتی ہے، اس لیے ہر صورت میں بجلی کی لاگت تقریباً 83 روپے فی یونٹ رہتی ہے، جو قومی گرڈ کے مقابلے میں تقریباً تین گنا ہے۔

چوبیس گھنٹے چلنے والی اسپننگ مل کے لیے صورت حال مزید مشکل ہوگی۔ اگر اس کی زیادہ سے زیادہ بجلی طلب 20 میگاواٹ اور لوڈ فیکٹر تقریباً 85 فیصد ہو تو یومیہ کھپت 408 میگاواٹ آور ہوگی، جس کا صرف ایک تہائی حصہ دھوپ کے اوقات میں استعمال ہوگا۔ ایسی فیکٹری کو تقریباً 180 میگاواٹ پیک شمسی نظام، 1,000 میگاواٹ آور سے زیادہ بیٹری ذخیرہ اور تقریباً 500 ایکڑ زمین درکار ہوگی۔ اس صورت میں بجلی کی لاگت تقریباً 89 روپے فی یونٹ ہوگی، جبکہ قومی گرڈ سے یہی بجلی 28.4 روپے فی یونٹ پڑے گی۔

زیادہ دھوپ والے مقام کا انتخاب بھی صرف معمولی فائدہ دے سکتا ہے۔ کراچی کے قریب سردیوں میں ہر کلوواٹ پیک سے روزانہ تقریباً 5.2 کلوواٹ آور بجلی پیدا ہوتی ہے اور یہاں دھند کا مسئلہ بھی نہیں، جس سے فی یونٹ لاگت کم ہوکر تقریباً 77 روپے رہ سکتی ہے۔

گھارو۔جھمپیر کی ہوائی توانائی کو بھی اس نظام میں شامل کرنے سے لاگت میں چند روپے کی مزید کمی ہوسکتی ہے، لیکن اس کی وجہ یہ ہے کہ سندھ میں ہواؤں کی رفتار سردیوں کے انہی مہینوں میں سب سے کم ہوتی ہے جو پورے نظام کی استعداد کا تعین کرتے ہیں (انرجیز، 2022ء)۔

اس کا مطلب کیا ہے؟

اصل امتحان پاکستان کے بڑے صنعتی بجلی صارفین کے حوالے سے ہے۔ بی-3 اور بی-4 کیٹیگریز کے صارفین صنعتی بجلی کے مجموعی کنکشنز کا بمشکل ایک فیصد ہیں، لیکن وہ صنعتوں کو فراہم کی جانے والی مجموعی بجلی کا تقریباً 60 فیصد استعمال کرتے ہیں۔ ان میں زیادہ تر سیمنٹ، اسٹیل اور اسپننگ جیسے مسلسل پیداواری عمل کے حامل کارخانے شامل ہیں، جو چوبیس گھنٹے کام کرتے ہیں۔

ایسی صنعتوں کے لیے مذکورہ چاروں رکاوٹیں مزید سنگین ہوجاتی ہیں اور قومی گرڈ سے مکمل علیحدگی کی صورت میں بجلی کی لاگت موجودہ نرخوں سے تقریباً تین گنا تک پہنچ سکتی ہے۔

سردیوں کا موسم شمسی توانائی کے نظام کی استعداد کا تعین کرتا ہے، جبکہ دھند بیٹریوں کی مطلوبہ گنجائش بڑھا دیتی ہے۔ ان دونوں ضروریات کو پورا کرنے کے لیے اتنی زمین درکار ہوتی ہے جو عام فیکٹریوں کے پاس دستیاب نہیں، جبکہ مجموعی لاگت قومی گرڈ کے نرخوں سے دو گنا سے بھی زیادہ ہوجاتی ہے۔

چنانچہ صنعتیں بجلی کے قومی گرڈ سے مکمل طور پر منقطع نہیں ہوں گی، البتہ گرڈ سے بجلی کی خریداری کم ضرور کردیں گی۔ وہ دن کے وقت شمسی توانائی، شام کے اوقات میں بجلی کی زیادہ طلب پوری کرنے کے لیے بیٹریوں اور سردیوں یا دھند کے دوران قومی گرڈ پر انحصار کریں گی۔ بجلی کے قومی گرڈ سے یہ جزوی علیحدگی ہی بجلی کی تقسیم کار کمپنیوں (ڈسکوز) کے لیے اصل چیلنج ہے۔

اس مسئلے کا حل بجلی کے نرخوں کے تعین کے طریقہ کار میں ہے۔ مقررہ اور اسٹینڈ بائی چارجز ایسے ہونے چاہییں جو اس اضافی پیداواری استعداد کے مطابق ہوں جسے فیکٹریاں ہنگامی ضرورت کے لیے برقرار رکھتی ہیں، نہ کہ شمسی توانائی اور بیٹریوں کے استعمال پر جرمانے عائد کیے جائیں۔ اگر قومی گرڈ کو قابلِ اعتماد متبادل نظام کے طور پر قیمت دی جائے تو صنعتی صارفین اس سے منسلک رہ سکتے ہیں، لیکن اگر نرخوں کا تعین صرف فی یونٹ بجلی کی بنیاد پر کیا گیا تو یہ صارفین بتدریج گرڈ سے دور ہوتے رہیں گے۔

کاپی رائٹ بزنس ریکارڈر، 2026ء