انڈر 19 ایشیا کپ، پاکستان نے بھارت کو 208 رنز پر آؤٹ کردیا

پاکستان کے بولرز نے اتوار کو عمان کے شہر العامرات میں ایشین کرکٹ کونسل (اے سی سی) انڈر 19 ایشیا کپ کے گروپ اے کے میچ میں بھارت کو 46.3 اوورز میں 208 رنز پر آؤٹ کردیا۔

بھارت نے ٹاس جیت کر پہلے بیٹنگ کا فیصلہ کیا، تاہم ارجن راجپوت کی سنچری کے باوجود پوری ٹیم 208 رنز بنا کر آؤٹ ہوگئی۔ ارجن راجپوت نے 85 گیندوں پر 107 رنز اسکور کیے، جن میں 11 چوکے اور پانچ چھکے شامل تھے۔

پاکستان کو پہلے ہی اوور میں اہم کامیابی ملی جب کپتان لکشیا رائے چندانی کو علی رضا نے بغیر کوئی رن بنائے آؤٹ کردیا۔

آریا ویر سہواگ نے 40 گیندوں پر 22 رنز بنائے، جبکہ وی کے ونیث صرف 8 رنز بنا سکے۔ اس طرح بھارت 11.4 اوورز میں 22 رنز پر تین وکٹیں گنوا چکا تھا۔

اس موقع پر ارجن راجپوت نے ذمہ دارانہ بیٹنگ کرتے ہوئے بھارتی اننگز کو سنبھالا اور اہم رنز جوڑے۔ انہیں انوے ڈریوڈ (10) اور منال چوہان (11) کا ساتھ ملا، جبکہ کاویا پریش پٹیل نے 45 گیندوں پر 23 رنز بنائے۔

ارجن راجپوت 35.2 اوورز میں مجموعی اسکور 170 رنز پر آؤٹ ہوئے تو بھارتی اننگز ایک بار پھر لڑکھڑا گئی اور ٹیم نے اپنے آخری پانچ کھلاڑی صرف 38 رنز کے اضافے پر کھو دیے۔

پاکستان کی جانب سے علی رضا، رضوان اللہ اور نقاب شفیق نے تین، تین وکٹیں حاصل کیں، جبکہ محمد سمیع نے ایک کھلاڑی کو آؤٹ کیا۔

رضوان اللہ نے سات اوورز میں 24 رنز دے کر تین وکٹیں حاصل کیں۔ علی رضا نے 10 اوورز میں 37 رنز کے عوض تین کھلاڑیوں کو آؤٹ کیا، جبکہ سمیع نے 8.3 اوورز میں 27 رنز دے کر ایک وکٹ حاصل کی۔

بھارت نے 13 اضافی رنز سمیت مجموعی طور پر 208 رنز بنائے اور پاکستان کو جیت کے لیے 209 رنز کا ہدف دیا۔