ڈالر کی تنزلی سے سونا مہنگا، ہفتہ وار بنیاد پر قیمت میں کمی کا امکان

ڈالر کی قدر میں کمی کے باعث جمعہ کو سونے کی قیمت میں معمولی اضافہ ہوا، تاہم سرمایہ کاروں کی جانب سے شرح سود کے حوالے سے فیڈرل ریزرو کے اشاروں کا جائزہ لینے کے باعث سونا اب بھی ہفتہ وار بنیاد پر معمولی گراوٹ کی جانب گامزن تھا۔

عالمی مارکیٹ میں اسپاٹ گولڈ کی قیمت 0.2 فیصد اضافے کے بعد 4,177.82 ڈالر فی اونس ہوگئی، تاہم رواں ہفتے اب تک اس کی قیمت میں 0.5 فیصد کمی ریکارڈ کی گئی ہے۔

دسمبر میں فراہمی کیلئے امریکی گولڈ فیوچرز کی قیمت بھی 0.7 فیصد بڑھ کر 4,199.10 ڈالر فی اونس ہوگئی۔

او اے این ڈی اے کے سینئر مارکیٹ تجزیہ کار کیلون وونگ نے کہا ہے کہ سونے کی قیمت 4,221 ڈالر کی بالائی حد کے اندر محدود رہی جبکہ رواں ہفتے کے آغاز میں اس کی قیمت اس حد کی نچلی سطح 4,075 ڈالر فی اونس تک بھی پہنچ گئی تھی۔

مہنگائی کے رجحانات اب بھی شدت اختیار کیے ہوئے ہیں کیونکہ ستمبر کے بنیادی صارف قیمت اشاریے (کور سی پی آئی) اور بنیادی پیداواری قیمت اشاریے (کور پی پی آئی) کے اعدادوشمار توقعات سے زیادہ رہے ہیں۔

امریکی ڈالر پانچ ہفتوں میں پہلی بار ہفتہ وار گراوٹ کی جانب گامزن رہا جس سے بیرون ملک خریداروں کے لیے ڈالر میں قیمت والا سونا نسبتاً سستا ہوگیا۔

اشیا اور خدمات کی بڑھتی لاگت کے باعث گزشتہ ماہ امریکا میں پیداواری قیمتوں میں ساڑھے چار سال کے دوران سب سے زیادہ اضافہ ریکارڈ کیا گیا۔ یہ اس بات کا تازہ اشارہ ہے کہ مہنگائی کے دباؤ کا دائرہ توانائی سے متعلق مصنوعات سے آگے بھی پھیل رہا ہے۔

یہ اعدادوشمار بدھ کو جاری ہونے والی صارف قیمتوں کی رپورٹ کے بعد سامنے آئے جس کے مطابق ستمبر میں پٹرول کی قیمتوں میں نمایاں اضافے کے باعث مہنگائی کی رفتار تیز ہوگئی تھی۔

سی ایم ای کے فیڈ واچ ٹول کے مطابق سرمایہ کار رواں ماہ کے آخر میں شرح سود میں اضافے کے 28 فیصد امکانات ظاہر کررہے ہیں جبکہ دسمبر میں شرح سود بڑھنے کا امکان 89 فیصد لگایا جارہا ہے۔

شکاگو فیڈ کے صدر آسٹن گولزبی نے کہا کہ رواں ہفتے مہنگائی کے توقعات سے زیادہ اضافے کے اعدادو شمار حوصلہ شکن ہیں۔ ادھر کلیولینڈ فیڈ کی صدر بیتھ ہیمک نے کہا کہ اگر عوام کی جانب سے مہنگائی کی توقعات میں نمایاں بگاڑ آیا تو فیڈرل ریزرو کو شرح سود میں زیادہ جارحانہ انداز میں اضافہ کرنا پڑسکتا ہے۔

اگرچہ سونے کو مہنگائی کے خلاف تحفظ کا ذریعہ سمجھا جاتا ہے، تاہم شرح سود میں اضافہ اس اثاثے کی کشش کم کردیتا ہے کیونکہ سونا سرمایہ کاروں کو سود کی صورت میں کوئی آمدنی نہیں دیتا۔

بھارت میں کئی بڑے میوچل فنڈز نے جمعرات کی رات عوامی نوٹس جاری کرتے ہوئے گولڈ ایکسچینج ٹریڈڈ فنڈز (ای ٹی ایف) میں بڑی رقوم کی سرمایہ کاری معطل کرنے کا اعلان کیا۔ یہ فیصلہ تہواروں کے موسم سے عین قبل کیا گیا ہے، جب عموماً سرمایہ کاروں کی جانب سے سونے کی طلب میں اضافہ ہوتا ہے۔

دیگر دھاتوں میں اسپاٹ چاندی کی قیمت 0.7 فیصد اضافے کے بعد 57.81 ڈالر فی اونس ہوگئی جب کہ پلاٹینم 1.1 فیصد بڑھ کر 1,642.75 ڈالر اور پیلیڈیم 1.5 فیصد اضافے کے بعد 1,143.46 ڈالر فی اونس پر پہنچ گیا۔

تاہم قیمتوں میں اضافے کے باوجود تینوں دھاتیں ہفتہ وار بنیاد پر گراوٹ کی جانب گامزن رہیں۔