ایف پی سی سی آئی انتخابات کا شیڈول جاری، پولنگ 17 دسمبر کو ہوگی
- عہدیداران کے انتخاب کے لیے کاغذاتِ نامزدگی جمع کرانے کی آخری تاریخ 30 نومبر 2026 مقرر کی گئی
پاکستان چیمبرز آف کامرس اینڈ انڈسٹری (ایف پی سی سی آئی) کی ایگزیکٹو کمیٹی نے سال 2027-28 کے لیے اپنے عہدیداران کے انتخاب کا شیڈول منظور کرلیا ہے۔
صدر، سینئر نائب صدر اور چار نائب صدور کے انتخاب کے لیے پولنگ 17 دسمبر 2026 کو ہوگی۔
عہدیداران کے انتخاب کے لیے کاغذاتِ نامزدگی جمع کرانے کی آخری تاریخ 30 نومبر 2026 مقرر کی گئی ہے۔
انتخابی نتائج کا اعلان 18 دسمبر 2026 کو کیا جائے گا۔
تین رکنی الیکشن کمیشن کا بھی اعلان کیا گیا ہے جس میں مسعود نقوی، جاوید اقبال مرزا اور بلال پرویز شامل ہیں۔
دریں اثنا صدر شیخ عمر ریحان کی قیادت میں کورنگی ایسوسی ایشن آف ٹریڈ اینڈ انڈسٹری (کاٹی) اور اس کی ایگزیکٹو کمیٹی نے معروف صنعت کار ایس ایم تنویر کو 2027-28 کی مدت کے لیے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کی صدارت کے لیے اپنا امیدوار نامزد کردیا ہے۔
کاٹی کی قیادت نے اس اعتماد کا اظہار کیا کہ ایس ایم تنویر کا انتخاب ملک کی صنعتی اور کاروباری برادری کو ایسی قیادت فراہم کرے گا جو نہ صرف ان کے مسائل اجاگر کرے گی بلکہ ان کے حل میں بھی مؤثر کردار ادا کرے گی۔
کاٹی کے صدر شیخ عمر ریحان نے کہا کہ جب پاکستان شدید معاشی عدم استحکام کا شکار تھا اور ڈیفالٹ کے دہانے پر کھڑا تھا، اس وقت ایس ایم تنویر نے نگران صوبائی وزیر کی حیثیت سے اپنے دور میں انتہائی محتاط اور دانشمندانہ حکمتِ عملی اختیار کی تھی۔
انہوں نے کہا کہ صنعتی شعبہ پہلے ہی متعدد چیلنجز کا سامنا کررہا تھا۔
انہوں نے کہا کہ ان حالات میں کاروباری برادری کے سب سے بڑے نمائندہ ادارے کو ایسی قیادت کی ضرورت ہے جو حکومت کے سامنے صنعت اور تجارت کا مقدمہ مؤثر انداز میں پیش کرنے کے ساتھ ساتھ پالیسی سازی میں کاروباری برادری کی آواز کو بھی مضبوط بنا سکے۔