وفاقی بورڈ آف ریونیو (ایف بی آر) نے برآمدی شعبوں سے وابستہ پانچ اقسام کے مینوفیکچررز کیلئے سیلز ٹیکس ریفنڈز سے متعلق منفی فہرست سے پولی یوریتھین کو خارج کردیا ہے جو لیدر مصنوعات میں استعمال ہونے والا ایک اہم خام مال ہے۔
یہ فیصلہ سیلز ٹیکس جنرل آرڈر (ایس ٹی جی او) نمبر 24 آف 2026 کے ذریعے کیا گیا ہے جس کے تحت 15 مارچ 2023 کو جاری کیے گئے ایس ٹی جی او نمبر 09 آف 2023 میں ترمیم کی گئی ہے۔
ترمیم شدہ حکم نامے کے تحت ایف بی آر نے ایچ ایس کوڈ 3909 کے تحت آنے والی اس شے کو منفی فہرست سے خارج کردیا ہے جو ایس ٹی جی او نمبر 09 آف 2023 کے ساتھ منسلک منفی فہرست میں سیریل نمبر 292 پر درج تھی۔
ایف بی آر نے کہا کہ اس شے کو منفی فہرست سے اس لیے خارج کیا گیا ہے کیونکہ یہ لیدر مصنوعات میں استعمال ہونے والے خام مال کا ایک اہم جزو ہے۔
یہ ترمیم ٹیکسٹائل، قالین، لیدر، سرجیکل اور کھیلوں کا سامان تیار کرنے والے مینوفیکچررز کے لیے سیلز ٹیکس ریفنڈ کے طریقہ کار سے متعلق ہے جو متعلقہ ریفنڈ نظام کے تحت آتے ہیں۔