تھائی لینڈ میں سیلاب کے باعث ٹویوٹا کے چار پلانٹس عارضی طور پر بند ہوگئے جب کہ قومی فضائی کمپنی تھائی ایئرویز نے کارگو آپریشنز معطل کردیئے ہیں۔
کمپنیوں نے بدھ کو بتایا کہ سیلاب سے یہ صورتحال پیدا ہوئی ہے۔
دارالحکومت بینکاک میں گزشتہ ہفتے کے آخر میں صرف تین روز کے دوران 320 ملی میٹر (12.6 انچ) بارش ہوئی جو پورے ستمبر میں شہر میں ہونے والی معمول کی بارش کے تقریباً برابر ہے جس کے بعد شہر کو آفت زدہ علاقہ قرار دے دیا گیا۔
ٹویوٹا کے ترجمان نے بتایا کہ سیلاب کے باعث ٹویوٹا کے تھائی یونٹ کو پرزہ جات کی ترسیل متاثر ہوئی ہے جس کے نتیجے میں تین پلانٹس اور مشترکہ منصوبے ٹویوٹا آٹو ورکس کی ایک تنصیب میں آپریشنز معطل کردیئے گئے ہیں۔
انہوں نے کہا کہ کمپنی سپلائرز کے ساتھ رابطے میں ہے تاکہ پرزہ جات کی ترسیل بحال اور جلد از جلد آپریشنز دوبارہ شروع کیے جاسکیں۔
تھائی ایئرویز نے بتایا کہ اس کے متعدد ملازمین سیلاب کے باعث کام پر پہنچنے سے قاصر ہیں جس کے پیش نظر ایئرلائن نے بدھ سے 6 اکتوبر تک اندرونِ ملک اور بیرونِ ملک جانے والے کارگو کی بکنگ اور ترسیل قبول کرنا روک دی ہے۔ کمپنی نے کہا کہ یہ خدمات جلد از جلد بحال کردی جائیں گی۔
وزارتِ داخلہ کے مطابق سیلاب سے اب تک کم از کم 24 افراد ہلاک ہوچکے ہیں جبکہ تھائی لینڈ کے 77 میں سے 44 صوبے متاثر ہوئے ہیں۔