کوہاٹ پولیس ہیڈکوارٹر پر حملہ، 31 شہید، 16 پولیس اہلکار بھی شامل
- فائرنگ اور جھڑپوں کا سلسلہ جاری ہے، پولیس اہلکار
کوہاٹ میں پولیس ہیڈکوارٹر پر دھماکے اور فائرنگ کے واقعے میں شہیدوں کی تعداد 31 ہوگئی جن میں 16 پولیس اہلکار بھی شامل ہیں۔ ایک سینئر پولیس افسر نے ہفتے کو اے ایف پی کو بتایا کہ فائرنگ اور جھڑپوں کا سلسلہ جاری ہے۔
حملہ آوروں نے جمعہ کی سہ پہر صوبہ خیبر پختونخوا کے شہر کوہاٹ میں واقع اولڈ پولیس لائنز کمپلیکس پر دھاوا بول دیا۔ کوہاٹ کی آبادی تقریباً 2 لاکھ 20 ہزار ہے۔
پولیس کمپاؤنڈ ضلعی سطح کے پولیس ہیڈکوارٹر کے طور پر استعمال ہوتا ہے جہاں کاؤنٹر ٹیررازم ڈپارٹمنٹ (سی ٹی ڈی)، اسپیشل برانچ اور پولیس کے کئی دیگر یونٹس کے اہم دفاتر قائم ہیں۔
افسر نے کہا کہ مسلح حملے اور خودکش دھماکے میں اب تک کم از کم 31 افراد شہید ہوچکے ہیں جن میں 16 پولیس اہلکار شامل ہیں جبکہ 100 سے زائد افراد زخمی ہوئے ہیں۔
پولیس افسر نے نام ظاہر نہ کرنے کی شرط پر اے ایف پی کو بتایا کہ کئی مسلح افراد اب بھی کوہاٹ پولیس کمپلیکس کے اسپیشل برانچ کے حصے میں چھپے ہوئے ہیں۔
انہوں نے مزید کہا کہ گزشتہ رات سے ان کے ساتھ فائرنگ کا تبادلہ جاری ہے۔ ان کی درست تعداد تاحال معلوم نہیں ہوسکی۔
کوہاٹ کے ضلعی ہیلتھ افسر کی جانب سے جمعہ کی رات جاری کیے گئے بیان میں کہا گیا کہ 100 سے زائد افراد زخمی ہوئے ہیں جن میں اکثریت پولیس اہلکاروں کی ہے جبکہ متعدد زخمیوں کی حالت تشویشناک ہے۔
مقامی عسکریت پسند گروہ، جو کالعدم ٹی ٹی پی سے وابستہ ایک دھڑے پر مشتمل ہے، نے اس حملے کی ذمہ داری قبول کر لی ہے۔