آسٹریلوی کوچ پوپوویچ نے 4 سالہ معاہدے میں توسیع کی پیشکش ٹھکرا دی
- آسٹریلیا کی ٹیم سوکروز نے امریکا میں ہونے والے رواں سال کے ورلڈ کپ کے ناک آؤٹ مرحلے میں جگہ بنا لی
آسٹریلیا کے کوچ ٹونی پوپوویچ نے انکشاف کیا ہے کہ انہوں نے 2030 کے ورلڈ کپ تک عہدے پر برقرار رکھنے والے 4 سالہ معاہدے کی توسیع کی پیشکش مسترد کردی اور آئندہ سال ایشین کپ تک معاہدہ کرنے کو ترجیح دی۔
آسٹریلیا کی ٹیم نے امریکا، کینیڈا اور میکسیکو میں ہونے والے رواں سال کے ورلڈ کپ کے ناک آؤٹ مرحلے میں جگہ بنائی، تاہم راؤنڈ آف 32 میں مصر کے ہاتھوں پنالٹی شوٹ آؤٹ پر شکست کے بعد ایونٹ سے باہر ہوگئی۔
پوپوویچ نے کہا کہ ایشین کپ تک معاہدہ ان کا اپنا فیصلہ تھا اور وہ اس پر مطمئن ہیں۔ 53 سالہ سابق آسٹریلوی کھلاڑی نے 2024 کے آخر میں گراہم آرنلڈ کی جگہ ذمہ داری سنبھالی تھی۔
پوپوویچ نے کہا کہ نوجوان کھلاڑیوں کی ترقی انہیں کوچنگ کے منصب میں خاص طور پر پسند ہے۔ سعودی عرب میں 7 جنوری سے 5 فروری تک ہونے والے ایشین کپ میں آسٹریلیا گروپ ڈی میں تاجکستان، عراق اور سنگاپور کے ساتھ شامل ہے۔
انہوں نے کہا کہ آسٹریلیا کو ایشین کپ جیتنے کا ہدف رکھنا چاہیے جبکہ ایونٹ کے بعد اگر فٹبال آسٹریلیا انہیں رخصت کرنے کا فیصلہ کرے تو وہ اس فیصلے سے بھی مطمئن ہوں گے۔