نئی رائیڈ ہیلنگ سروس ڈرائیور پاکستانی مارکیٹ میں داخل ہونے کے لیے تیار

ملک کی رائیڈ ہیلنگ مارکیٹ میں ایک نیا کھلاڑی داخل ہونے جا رہا ہے، جہاں جاز ورلڈ انٹرپرائز سلوشنز نے ڈرائیور کے اجرا کے لیے آئی ٹیکنالوجی کے ساتھ اسٹریٹجک مفاہمتی یادداشت (ایم او یو) پر دستخط کیے ہیں۔

جاری بیان کے مطابق یہ پلیٹ فارم مختلف ذرائع نقل و حمل، جن میں کاریں، موٹر سائیکلیں اور رکشے شامل ہیں، کے ذریعے رائیڈ ہیلنگ کی سہولت فراہم کرے گا۔

کمپنی نے کہا کہ پلیٹ فارم کی ایک اہم خصوصیت یہ ہوگی کہ جاز نیٹ ورک استعمال کرنے والے مسافر اور ڈرائیور موبائل ڈیٹا خرچ کیے بغیر ایپ تک رسائی حاصل کرسکیں گے۔ اس سہولت کے باعث صارفین ایپ کے لیے الگ انٹرنیٹ پیکیج لیے بغیر رائیڈ بک کرنے، درخواستیں قبول کرنے اور اپنے سفر کا انتظام کرنے کے قابل ہوں گے۔

معاہدے کے تحت جاز کیش ڈرائیور کے نظام میں ڈیجیٹل ادائیگیوں کی سہولت فراہم کرے گا۔دوسری جانب آئی ٹیکنالوجی پلیٹ فارم کی ٹیکنالوجی، سروس میں جدت اور آپریشنز سے متعلق امور کی قیادت کرے گی، جبکہ جاز پلیٹ فارم کو کنیکٹیویٹی اور ڈیجیٹل انفرااسٹرکچر کی معاونت فراہم کرے گا۔

پاکستان میں رائیڈ ہیلنگ کا شعبہ روزمرہ آمدورفت کا ایک اہم حصہ بن چکا ہے۔ یہ شعبہ محدود عوامی ٹرانسپورٹ کے باعث پیدا ہونے والے خلا کو تیزی سے پُر کرنے کے ساتھ ساتھ آمدن کے نئے مواقع بھی فراہم کر رہا ہے۔

حالیہ برسوں میں رائیڈ ہیلنگ کا شعبہ روایتی خدمات سے آگے بڑھ کر وسیع تر سپر ایپ ماڈل کی جانب بھی گامزن ہے، جس میں کورئیر ڈیلیوری، مال برداری اور گروسری سروسز شامل ہیں۔ اس طرح آمدن کے متنوع مواقع پیدا ہونے کے ساتھ ساتھ ملکی ڈیجیٹل معیشت میں اس شعبے کا کردار بھی مزید مضبوط ہو رہا ہے۔