سری لنکا میں خوراک مہنگی، اگست کی مہنگائی 8 فیصد کی بلند ترین سطح پر پہنچ گئی

سری لنکا کے محکمہ شماریات نے پیر کو بتایا کہ کولمبو کنزیومر پرائس انڈیکس میں اگست میں سالانہ بنیاد پر 8 فیصد اضافہ ہوا، جبکہ جولائی میں یہ شرح 7.3 فیصد رہی تھی۔

یہ انڈیکس ملک میں مجموعی قیمتوں کے رجحان کا اہم اشاریہ ہے اور سری لنکا کے دارالحکومت میں مہنگائی کی صورتحال کی عکاسی کرتا ہے۔

تجزیہ کاروں کے مطابق اگست میں غذائی مہنگائی بڑھ کر 8.5 فیصد ہوگئی، جو جولائی میں سالانہ بنیاد پر 6.3 فیصد تھی۔ اس اضافے کی وجوہات میں ایل نینو سے منسلک شدید خشک سالی کے باعث ملک کے اہم زرعی علاقوں میں فصلوں کی پیداوار متاثر ہونا اور عالمی سطح پر گندم کی قیمتوں میں اضافہ شامل ہیں۔

تازہ اعداد و شمار کے مطابق غیر غذائی اشیا کی مہنگائی 7.7 فیصد رہی، جبکہ گزشتہ ماہ یہ شرح 7.8 فیصد تھی۔

ایچ این بی اسٹاک بروکرز کے شعبہ تحقیق کے سربراہ شہان کورے نے کہا، ’’اگلے دو ماہ کے دوران مہنگائی بڑھ کر 8.5 فیصد تک پہنچنے کا امکان ہے، جس کے بعد اس میں کمی آنا شروع ہوسکتی ہے، تاہم اس کا انحصار موسمی حالات اور عالمی قیمتوں پر ہوگا۔‘‘

سری لنکا میں مہنگائی گزشتہ ماہ سے تین سال کی بلند ترین سطح پر ہے، جس کی بڑی وجہ ایران جنگ کے باعث توانائی کی بڑھتی ہوئی قیمتیں ہیں۔

سری لنکا کے مرکزی بینک نے مہنگائی کا ہدف 5 فیصد مقرر کر رکھا ہے اور توقع ہے کہ درمیانی مدت میں مہنگائی بتدریج کم ہوجائے گی۔