پاکستان، ترکیہ، سعودی عرب کا دفاعی معاہدے کے تحت پہلا اجلاس آج ہوگا

مکہ مشترکہ دفاعی معاہدے کے تحت قائم اسٹریٹجک، سیاسی و دفاعی کمیٹی کا پہلا اجلاس آج (پیر) استنبول میں ہوگا۔

پاکستان کی وزارتِ خارجہ اور ترک وزارتِ خارجہ نے اتوار کو اپنے الگ الگ بیانات میں اجلاس کی تصدیق کی۔

اجلاس میں تینوں ممالک کے اعلیٰ سطح سیاسی اور عسکری حکام شرکت کریں گے جو معاہدے کے تحت اسٹریٹجک سیاسی اور دفاعی تعاون سے متعلق امور پر تبادلہ خیال کریں گے۔

دفترِ خارجہ کے مطابق اجلاس میں پاکستان کی نمائندگی نائب وزیراعظم و وزیر خارجہ محمد اسحاق ڈار، وفاقی وزیر دفاع خواجہ محمد آصف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر کریں گے۔

بیان میں کہا گیا کہ اجلاس میں ترکیہ اور سعودی عرب کے وزرائے خارجہ، وزرائے دفاع اور چیفس آف جنرل اسٹاف بھی شرکت کریں گے۔

ترک وزارت خارجہ کے مطابق اجلاس میں ترک وزیر خارجہ حاقان فیدان، وزیر دفاع یشار گولر اور چیف آف جنرل اسٹاف جنرل سلچک بایراکتار اوغلو شرکت کریں گے۔

دفترِ خارجہ نے کہا کہ اجلاس میں پاکستان کی شرکت برادر ممالک ترکیہ اور سعودی عرب کے ساتھ پاکستان کے تاریخی دوستانہ تعلقات کے ساتھ ساتھ پائیدار علاقائی امن اور استحکام کے لیے اس کی خواہش کی عکاسی کرتی ہے۔ یہ اجلاس مکہ مشترکہ دفاعی معاہدے کے تحت قائم کی گئی کمیٹی کا پہلا باضابطہ اجلاس ہے جس پر ترکیہ، پاکستان اور سعودی عرب نے دستخط کیے تھے۔

یہ پیش رفت ایسے وقت میں سامنے آئی ہے جب فیلڈ مارشل عاصم منیر اور نائب وزیراعظم اسحاق ڈار سرکاری مصروفیات کے سلسلے میں ترکیہ میں موجود ہیں۔