انٹربینک مارکیٹ: ڈالر کے مقابلے میں روپیہ مزید تگڑا

انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 277.52 روپے پر بند ہوا۔

یاد رہے کہ پیر کو مقامی کرنسی 277.55 روپے پر بند ہوئی تھی۔

دریں اثنا امریکی ڈالر منگل کو بڑی کرنسیوں کے مقابلے میں اپنی حالیہ برتری برقرار رکھنے میں مشکلات کا شکار رہا کیونکہ سرمایہ کاروں نے واشنگٹن کی جانب سے ایران سے متعلق پابندیوں میں توسیع اور طویل مدتی امریکی ٹریژری بانڈز کی شرحِ منافع پر دباؤ کم کرنے کی نئی کوششوں کا جائزہ لیا۔

یورو معمولی اضافے کے ساتھ 1.1668 ڈالر پر رہا اور گزشتہ ہفتے کی تین ماہ کی بلند ترین سطح کے قریب منڈلاتا رہا جبکہ برطانوی پاؤنڈ 0.1 فیصد مضبوط ہو کر 1.3639 ڈالر پر پہنچ گیا جو چھ ماہ کی بلند ترین سطح کے قریب ہے۔

جاپانی ین امریکی ڈالر کے مقابلے میں معمولی مضبوط ہو کر 159.21 ین فی ڈالر پر پہنچ گیا۔ ین اپنی قدر میں اضافے کے لیے کیے گئے مرکزی بینک کے اقدام سے حاصل ہونے والے بیشتر فوائد واپس کھو چکا ہے، تاہم اب بھی تقریباً 164 ین فی ڈالر کی کئی دہائیوں کی کم ترین سطح سے خاصا اوپر ہے۔

دوسری جانب ڈالر انڈیکس ایشیائی کاروباری اوقات میں معمولی کمی کے ساتھ 98.96 پر آگیا۔

ڈالر انڈیکس میں گزشتہ روز 0.16 فیصد اضافہ ہوا تھا جس کے باعث یہ تین ماہ کی کم ترین سطح سے اوپر آیا جبکہ کرنسی کی قدر میں کمی سے تحفظ کی تجارت دوبارہ زور پکڑ رہی ہے۔ تاہم ڈالر بظاہر اس رفتار کو برقرار رکھنے میں مشکلات کا شکار ہے۔

مزید برآں منگل کو تیل کی قیمتوں میں بھی بحالی دیکھی گئی اور گزشتہ سیشن میں 2 فیصد سے زائد کمی کے بعد قیمتیں دوبارہ بڑھ گئیں جبکہ سرمایہ کار ایران کے خلاف امریکا کی جانب سے عائد کی جانے والی تازہ پابندیوں کے اثرات کا جائزہ لے رہے ہیں۔