امریکی پالیسی اقدامات اور پاکستان کے لیے اسباق

29 جولائی 2026 کو ’’ایکسیوس‘‘، جس کے بارے میں معروف ہے کہ اس کے ٹرمپ وائٹ ہاؤس سے قریبی روابط ہیں، نے رپورٹ کیا ہے کہ امریکی صدر ڈونلڈ ٹرمپ نے اسرائیلی وزیراعظم سے اپنی حالیہ ملاقاتوں میں سے ایک کے دوران مشرقِ وسطیٰ کی جنگ کے عالمی مالیاتی نظام پر پڑنے والے سنگین اثرات پر تشویش کا اظہار کیا ہے۔

کیا یہ اعتراف ہی امریکی صدر کی حکمتِ عملی میں تبدیلی کا سبب بنا، جس کا اظہار ایکسیوس کے ساتھ فون پر گفتگو کے دوران ہوا، جہاں ان کے حوالے سے کہا گیا: ’’ہم اسے فی الحال زیادہ نمایاں نہیں کر رہے‘‘۔ اس سے مراد یہ ہے کہ جنگ کے بدلتے ہوئے اہداف کے حصول کے لیے نئی فوجی کارروائی شروع کرنے کے بجائے معاشی دباؤ کو مؤثر ہونے کا موقع دیا جائے۔ انہوں نے مزید کہا: ’’ہم ان کے ساتھ صرف نیم مذاکرات کر رہے ہیں، ہم بس ایران کو دیکھ رہے ہیں، جہاں افراطِ زر بہت زیادہ ہے اور ان کے پاس پیسہ بھی نہیں۔‘‘

تاہم تنازع کے باعث پیدا ہونے والی رسد میں رکاوٹوں کو یہ نئی ’کم نمایاں‘ حکمتِ عملی اس وقت تک ختم یا الٹ نہیں سکتی جب تک آبنائے ہرمز میں بحری آمدورفت 28 فروری سے پہلے کی سطح پر بحال نہیں ہوجاتی۔ یہ بحالی تاحال تعطل کا شکار ہے کیونکہ ایران نے اس آبی گزرگاہ کو تنازع سے پہلے کی معمول کی عملی آزادی پر واپس لانے سے انکار کر رکھا ہے، جبکہ امریکا کی بحری ناکہ بندی بھی جاری ہے۔

اس تناظر میں ایران کی پالیسی میں حالیہ تبدیلی قابلِ ذکر ہے۔ ایران نے جوابی کارروائی میں یکساں پیمانے پر ردعمل دینے کے بجائے 9 اگست، یعنی ہفتے کے اختتام پر، دو بحری جہازوں کو نشانہ بنایا اور پھر اگلے پیر کی صبح دوبارہ حملہ کیا۔ یوں اس نے صدر ٹرمپ کی سابقہ ہفتہ وار حکمتِ عملی کو مات دے دی، جس کے تحت وہ عموماً اتوار کو کسی ممکنہ معاہدے کا اعلان کرتے، جس کے نتیجے میں پیر کی صبح مارکیٹیں—جن پر وہ مبینہ طور پر گہری نظر رکھتے ہیں—شدید مندی کا شکار ہوتیں، اور پھر ہفتے کے باقی دنوں میں اس وقت بحال ہوتیں جب صدر ایران پر حملوں کا حکم دیتے۔ اب تک امریکا کی جانب سے کوئی جوابی کارروائی نہیں کی گئی۔

دریں اثنا، امریکی صارفین بدستور عالمی سطح پر رسد میں پیدا ہونے والی رکاوٹوں کا خمیازہ بھگت رہے ہیں، جس کے باعث ملک میں قیمتیں بڑھ گئی ہیں۔ اس کی ایک وجہ درآمدی سور آئل کی قیمت میں اضافہ ہے، جسے ڈیزل اور طیاروں کا ایندھن تیار کرنے کے لیے ریفائن کیا جاتا ہے، جبکہ اس کے مقابلے میں امریکا میں پیدا ہونے والا وافر مقدار میں دستیاب سویٹ آئل نسبتاً موزوں ہے۔ تاہم امریکی ریفائنریز عموماً پیداوار زیادہ سے زیادہ کرنے کے لیے دونوں اقسام کے خام تیل کو ملا کر استعمال کرتی ہیں۔ اس کے علاوہ قطر سے بالخصوص مائع قدرتی گیس، ہیلیم—جو ایل این جی کی پروسیسنگ کے دوران حاصل ہونے والی ایک قیمتی ضمنی پیداوار ہے اور سیمی کنڈکٹرز، فائبر آپٹکس، ایرو اسپیس اور طبی ایم آر آئی سمیت جدید ٹیکنالوجی کے لیے انتہائی اہم ہے—یوریا اور امونیا، پلاسٹکس، پولیمرز، ایسنک الکوحلز اور مخصوص صنعتی کیمیائی مشتقات کی رسد بھی متاثر ہوئی ہے۔

تاہم امریکی صارفین پر پڑنے والے اثرات، خصوصاً کھاد کی قیمتوں میں اضافے کے نتیجے میں خوراک کی قیمتوں میں ممکنہ اضافے کو دیکھتے ہوئے، اس خطرے کو نمایاں نہیں کیا جا رہا کہ خلیجی ممالک سے کھاد کی فراہمی پر بہت زیادہ انحصار کرنے والے غریب، کم آمدنی والے اور حتیٰ کہ بعض متوسط آمدنی والے ممالک میں کھاد کے ذخائر کم ہوتے ہوتے قحط کی صورتِ حال پیدا ہوسکتی ہے۔

سوال یہ ہے کہ امریکا نے تنازع کو ’کم نمایاں‘ رکھنے کی پالیسی کیوں اختیار کی؟ صدر ٹرمپ کے بیان سے ظاہر ہونے والی ایک وجہ یہ ہے کہ ان کا خیال ہے کہ اس مرتبہ پابندیاں مؤثر ثابت ہوں گی۔ ایران گزشتہ 47 برس سے زائد عرصے سے امریکی پابندیوں کی زد میں ہے، جنہیں وہ مبینہ طور پر متحدہ عرب امارات کے ساتھ تجارتی روابط کے ذریعے جزوی طور پر غیر مؤثر بناتا رہا، مگر اب یہ ذریعہ ایران کے لیے دستیاب نہیں رہا۔

تاہم حالیہ جغرافیائی سیاسی بڑی تبدیلیاں امریکا اور اس کے مغربی اتحادیوں کی قیادت میں پابندیوں کے اس ’ہتھیار‘ کی افادیت مسلسل کم کر رہی ہیں۔ ان میں:

(الف) خلاف ورزی کرنے والی کمپنیوں اور ممالک پر سخت سزائیں عائد کرنا، جن میں اثاثوں کو منجمد کرنا، تجارتی پابندیاں اور سوئفٹ (سوسائٹی فار ورلڈ وائیڈ انٹربینک فنانشل کمیونیکیشن) کے استعمال سے محروم کرنا شامل ہے۔

چین نے حال ہی میں اپنی ان کمپنیوں کو سرِعام ہدایت کی ہے جو پابندیوں کی زد میں آنے والے روس اور ایران کے ساتھ کاروبار کرتی ہیں کہ وہ امریکی پابندیوں کو نظرانداز کریں۔ اسی دوران چین کی جانب سے 2015 میں شروع کیے گئے کراس بارڈر انٹربینک پیمنٹ سسٹم (سی آئی پی ایس) کے استعمال میں ڈرامائی اضافہ ہوا ہے۔ یہ ایک ڈیجیٹل نظام ہے جو سرحد پار اور ملکی لین دین کو، جس میں چینی یوآن کا غلبہ ہے، زیادہ تیزی اور مؤثر انداز میں انجام دیتا ہے۔

(ب) خلیجی ممالک کی حمایت یافتہ پیٹرو ڈالر نظام بھی کمزور پڑ رہا ہے۔ اس نظام کے تحت تیل کی قیمت صرف ڈالر میں مقرر کی جاتی تھی، تاہم ایران نے آبنائے ہرمز سے گزرنے والی آمدورفت کے لیے، جب بھی اسے موقع ملا، چینی کرنسی یا کرپٹو میں ادائیگیاں قبول کرنا شروع کردی ہیں۔

مزید برآں، خلیج سے توانائی کی برآمدات میں نمایاں کمی کے باعث دو خلیجی ممالک کو لیکویڈیٹی بحران کا سامنا ہے۔ متحدہ عرب امارات نے پہلے امریکا سے مدد طلب کی اور بالواسطہ طور پر خبردار کیا کہ اگر کرنسی سواپ کا انتظام نہ کیا گیا تو اسے اپنے پاس موجود امریکی ٹریژری بانڈز فروخت کرنے پڑ سکتے ہیں۔ انہی بانڈز کی بدولت امریکا کو ہر سال کھربوں ڈالر انتہائی سستے نرخوں پر دستیاب ہوتے ہیں۔

فی الوقت سعودی عرب بھی لیکویڈیٹی بحران سے دوچار ہے اور اس کے پاس تقریباً 1.3 ٹریلین ڈالر مالیت کے امریکی ٹریژری بانڈز موجود ہیں۔ اگر یہ بانڈز فروخت کیے گئے تو امریکی ڈالر شدید دباؤ کا شکار ہوسکتا ہے۔ ان جغرافیائی سیاسی تبدیلیوں کے نتیجے میں امریکی وزیر خزانہ سکاٹ بیسنٹ کو بھی جینٹ ییلن کی طرز پر، یعنی عملی طور پر، کم شرح والے ٹریژری بلز پر بھرپور انحصار کرنا پڑا تاکہ بجٹ خسارہ پورا کیا جاسکے۔

5 اگست 2026 کو تین ماہ کے ٹریژری بل پر منافع کی شرح 3.8 فیصد، 10 سالہ بل پر 4.6 فیصد جبکہ 30 سالہ بل پر 5 فیصد سے زائد تھی۔ بیسنٹ نے نسبتاً سستی شرح سے غیر معمولی حد تک فائدہ اٹھاتے ہوئے تقریباً 2 ٹریلین ڈالر کے بجٹ خسارے کی مالی اعانت کی۔ اگرچہ اس اقدام سے بجٹ میں قرض لینے کی لاگت کم رکھنے میں مدد ملی، تاہم اس کے نتیجے میں امریکی صارفین کو بلند افراطِ زر اور بڑھتی ہوئی شرح سود کا سامنا کرنا پڑ سکتا ہے۔

(ج) برکس (برازیل، روس، بھارت، چین اور جنوبی افریقا) بھی پابندیوں کے نظام کی افادیت کو مزید کمزور کرنے والا عنصر ہے۔ اس وقت 21 ممالک پر مشتمل اس گروپ میں ایران بھی شامل ہے، جبکہ مزید ممالک نے رکنیت کے لیے درخواستیں دے رکھی ہیں جن پر غور جاری ہے۔ برکس کو ایک نئے طاقتور کثیرالجہتی معاشی اتحاد کے طور پر دیکھا جا رہا ہے، جو امریکی پابندیوں کے نظام کی مؤثریت کو مزید محدود کرسکتا ہے۔

ایک اور وجہ، جسے اب سامنے آنے والے لٹریچر کی ایک بڑی تعداد کی تائید حاصل ہے—جس میں بعض آزاد ذرائع شامل ہیں جبکہ بعض معلومات ایسے سرکاری حکام سے حاصل کی گئی ہیں جو اپنا نام ظاہر نہیں کرنا چاہتے—یہ ہے کہ امریکا اس وقت گولہ بارود اور جنگی سازوسامان کی قلت کا سامنا کر رہا ہے۔ سینٹر فار اسٹریٹیجک اینڈ انٹرنیشنل اسٹڈیز کے اندازوں کے مطابق:

(الف) پیٹریاٹ میزائلوں کے تقریباً دو تہائی انٹرسیپٹرز اور THAAD کے 60 فیصد ذخیرے استعمال ہوچکے ہیں؛

(ب) ATACMS اور پریسیژن اسٹرائیک میزائلز کے ذخائر میں نمایاں کمی واقع ہوچکی ہے؛ اور

(ج) جنگ سے پہلے کی سطح تک ذخائر دوبارہ بھرنے میں کئی ماہ سے کئی برس تک لگ سکتے ہیں۔ اس عمل کے لیے درکار اہم معدنیات اور نایاب ارضی دھاتوں میں سے کئی کی درآمد چین سے ہوتی ہے، جو اس وقت معطل ہے۔

جب صدر ٹرمپ سے اس بارے میں پوچھا گیا تو انہوں نے کہا: ’’ہمیں ہر وقت مزید (گولہ بارود) درکار ہوتا ہے۔۔۔ ہمارے پاس بعض اقسام کا انتہائی طاقتور گولہ بارود ہے، جس کا ذخیرہ لامحدود، تقریباً لامحدود ہے۔ لیکن کچھ اقسام میں صورتحال قدرے تنگ ہے اور ہمیں یہ روزانہ کی بنیاد پر مل رہی ہیں۔‘‘

اس وقت تجزیہ کاروں کے سامنے بنیادی سوال یہ ہے کہ دونوں میں سے کون سا ملک زیادہ عرصے تک دباؤ برداشت کرنے کی صلاحیت رکھتا ہے؟ 28 فروری کو ایرانی قیادت کے سر قلم کیے جانے جیسے حملے، شہریوں اور متعلقہ بنیادی ڈھانچے پر وحشیانہ کارروائیوں اور صدر ٹرمپ کی تقریباً روزانہ کی زبانی تضحیک کے بعد ایرانی عوام واضح طور پر اپنی حکومت کے گرد متحد ہوگئے ہیں۔

امریکی عوام کی بڑی تعداد جنگ کی مخالف ہے۔ تاہم یہ خیال کہ ری پبلکن وسط مدتی انتخابات میں شکست کھا سکتے ہیں، جس کے نتیجے میں صدر کے مواخذے کی راہ ہموار ہوسکتی ہے—اور جس کا خدشہ صدر ٹرمپ خود چند ماہ قبل ظاہر کرچکے ہیں—اب یقینی نتیجہ نہیں سمجھا جا رہا۔ اس کی دو بڑی وجوہات ہیں۔

اول، ٹرمپ کانگریس کو سیو ایکٹ (Save Act) منظور کرنے پر آمادہ کرنے میں کامیاب ہوسکتے ہیں، جس کے نتیجے میں انتخابات پر وفاقی حکومت کا اختیار بڑھ جائے گا۔ ٹرمپ یہ مؤقف اختیار کر رہے ہیں کہ 2020 میں ان کی شکست جائز نہیں تھی۔ ان کے بعض حامی ان پر زور دے رہے ہیں کہ اگر وسط مدتی انتخابات تک یہ قانون منظور نہ ہو تو وہ ہنگامی حالت نافذ کردیں تاکہ انتخابی قوانین کو نظرانداز کیا جاسکے۔

دوم، ڈیموکریٹس بدستور تقسیم کا شکار ہیں۔ بائیں بازو سے تعلق رکھنے والے متعدد سوشلسٹ امیدوار حالیہ پرائمری انتخابات میں پارٹی قیادت کو چیلنج کرنے میں کامیاب رہے ہیں اور اسٹیٹس کو، خصوصاً اسرائیل کی جانب سے نسل کشی کی مسلسل حمایت، کے خلاف آواز اٹھا رہے ہیں۔ مشی گن میں السید کی کامیابی اس کی ایک مثال ہے۔ یاد رہے کہ رواں برس صدر ٹرمپ کے اسٹیٹ آف دی یونین خطاب کا واحد حصہ جس کی ری پبلکنز کے ساتھ ساتھ ڈیموکریٹس نے بھی کھل کر حمایت کی، وہ اسرائیل کی نسل کشی کی حمایت تھا۔

آخر میں بہت سے لوگ امریکا اور پاکستان کے اقدامات میں مماثلت دیکھ سکتے ہیں، تاہم دونوں کے درمیان ایک بنیادی فرق ہے۔ امریکا ایک عالمی طاقت ہے، اگرچہ اب اسے ڈالر کی بالادستی برقرار رکھنے میں مشکلات کا سامنا ہے، جس کی بدولت وہ انتہائی سستے نرخوں پر قرض حاصل کرتا رہا ہے۔ اس کے برعکس پاکستان اپنے انتہائی محدود وسائل پر اشرافیہ کی گرفت برقرار رکھنے کے لیے مالیاتی اور زرّی پالیسیوں کے ذریعے بڑے پیمانے پر قرض لیتا رہا ہے۔ افسوس ناک امر یہ ہے کہ یہ سلسلہ آج بھی جاری ہے۔

کاپی رائٹ بزنس ریکارڈر، 2026