بھارت کے مذہبی رتھ میلے میں بھگدڑ، ایک ہلاک اور 100 افراد زخمی

بھارت میں حکام کے مطابق مشرقی ریاست اوڈیشہ کے شہر پوری میں جمعرات کو مشہور رتھ میلے کے دوران بھگدڑ مچنے سے کم از کم ایک شخص ہلاک جبکہ تقریباً 100 افراد کو اسپتال منتقل کرنا پڑا۔

ہزاروں عقیدت مند سالانہ جگن ناتھ رتھ یاترا میں شرکت کے لیے جگن ناتھ مندر پہنچے تھے۔ یہ تہوار بھارت کے سب سے بڑے اور مقدس مذہبی میلوں میں شمار ہوتا ہے۔ گزشتہ سال بھی اسی میلے کے دوران بھگدڑ میں تین افراد ہلاک ہو گئے تھے۔

میلے میں تعینات پولیس افسر سومیندر پریہ درشی نے بتایا کہ ایک شخص دل کا دورہ پڑنے سے انتقال کر گیا۔

فائر اینڈ ایمرجنسی سروسز کے افسر اوما شنکر داس کے مطابق تقریباً 100 افراد کو سانس لینے میں دشواری کی شکایت پر اسپتال منتقل کیا گیا۔

ریاست اوڈیشہ کی پولیس نے ایکس پر جاری بیان میں کہا ہے کہ امدادی کارکنوں نے عقیدت مندوں کو موقع پر ابتدائی طبی امداد اور آکسیجن فراہم کی۔

بھارت میں بڑے عوامی اور مذہبی اجتماعات کے دوران بھگدڑ کے واقعات عام ہیں، کیونکہ ایسے مواقع پر حفاظتی ضوابط اور انتظامات کو اکثر نظر انداز کر دیا جاتا ہے۔

گزشتہ سال جنوری میں ریاست اتر پردیش میں منعقد ہونے والے مہا کمبھ میلے کے دوران بھگدڑ مچنے سے کم از کم 39 افراد ہلاک ہو گئے تھے۔